Вашингтонд фитнес төвд гарсан буудлагад нэг хүн амиа алдаж, буудагч барилгад хаалт хийн хоргодов

АНУ-ын нийслэл Вашингтонд Цагаан ордноос алхаад хүрэх зайд орших, алдартай Логан Сёркл хорооллын ойролцоо гарсан буудлагад дор хаяж нэг хүн амиа алдаж, дөрвөн хүн шархадсаныг нийслэлийн цагдаа мэдэгдлээ.

Буудсан гэж сэжиглэгдсэн этгээд ойролцоох орон сууцны барилгын дээд давхарт хаалт хийн хоргодсон бөгөөд хэн болох нь, ямар сэдэлтэй байсан нь хараахан тодорхойгүй байна.

АНУ-ын хэвлэлийн мэдээлснээр, зэвсэгт эр Vida Fitness фитнес төвд орж, нэгэн үйлчлүүлэгчийг араас нь буудаад барилгаас гүйн гарчээ. Фитнес төвөөс хүмүүсийг нүүлгэн гаргасан бөгөөд гудамжинд дахин буун дуу гарсны дараа тэд зүг зүгт тарж зугтсан байна.

Ойролцоох улсын сургуулиудыг хаалттай горимд шилжүүлж, сурагчдыг гаргахгүй, хэнийг ч оруулахгүй байна. Цагдаа тухайн орчмыг хааж, иргэдийг байрнаасаа гарахгүй байхыг уриалсан бөгөөд тусгай хүчний баг болон бусад албан хаагчдыг хэргийн газарт илгээжээ.

Орон нутгийн цагаар өглөөний 8 цагийн орчим буудлага эхлэхэд фитнес төвд байсан нэгэн гэрч дотор нь 50 орчим хүн байсан гэж ярьжээ.

“Хэдхэн секундийн дотор нэг эр газар унаж, доороос нь цус урсаж эхэлсэн. Фитнесийн үйлчлүүлэгчдийн нэг нь түүнд туслахаар гүйж очсон. Тэр эр тэр дороо нас барсан. Хүзүүнд нь буудсан байсан” гэж гэрч хэлэв.

Тэрбээр бусадтай хамт фитнес төвөөс гүйн гарсан бөгөөд дотор хоёр удаа, гадаа дахин тав, зургаан удаа буудсан гэж бодож байгаагаа хэлжээ.

Энэ орчимд өмнө нь ч хүчирхийллийн гэмт хэрэг гарч байсан. 2025 оны наймдугаар сарын нэгэн ням гарагийн шөнө өсвөр насны хэсэг залуус Засгийн газрын үр ашгийн газрын ажилтан асан эр рүү дайрч, түүний болон хамт явсан эмэгтэйн машиныг хулгайлахыг оролдсон юм. Энэ газрыг Ерөнхийлөгч Дональд Трампын үед зардал танах зорилгоор байгуулсан билээ.