Вэнсийн захидлыг эерэг алхам гэж Ираны Гадаад хэргийн сайд Аракчи үнэлэв

АНУ-ын Дэд ерөнхийлөгч Жей Ди Вэнс Тегеранд захидал илгээж, яриа хэлэлцээг сэргээхийг оролдсоныг зөвхөн сайшаах хэрэгтэй гэж Ираны Гадаад хэргийн сайд Аббас Аракчи Аль Жазира телевизэд мэдэгджээ. Энэ тухай Интерфакс агентлаг мэдээлэв.

«Америкийн тал яриа хэлэлцээний үүд хаалгыг нээх гэж оролдож байгаа нь эерэг алхам» гэж сайд хэлжээ.

Түүний хэлснээр, Ираны эрх баригчид өндөр албан тушаалтнуудын оролцсон хэд хэдэн уулзалтаар Вэнсийн захидлыг судалжээ. Хэрэв АНУ захидлаар хагарал үүсгэхийг зорьсон бол Америкийн засаг захиргаа дахин нэг алдаа гаргасан гэж Аракчи нэмж хэлсэн байна.

Аракчи өөрийн туслах зэрэг Ираны төлөөлөгчид зуучлагчидтай хэлэлцээгээ үргэлжлүүлэхээр Доха руу явсныг баталжээ. Катар, Пакистаны зуучлагчид Ираны нөхцөлийг хэлэлцэж байгаа ч Ираны албаныхан АНУ-ын албаны хүмүүстэй уулзах төлөвлөгөө одоогоор байхгүй гэж тэрбээр онцолжээ.

«Бидний нөхцөл тодорхой бөгөөд зуучлагчид энэ сэдвээр зөвлөлдсөөр байна» гэж Аракчи тайлбарласан байна.

Иран АНУ-тай шууд эсвэл зуучлалаар хэлэлцээ хийх эсэх нь Ираны шаардлага биелэгдэхээс хамаарна гэж сайд нэмжээ. Мөн цөмийн хөтөлбөрийн талаарх зуучлагчдын саналыг Тегеранд судалж байгаа бөгөөд эдгээр нь одоогийн бус, дараагийн шатанд хамаарах аж.

Өмнөх өдөр нь Катарын зуучлагчид Иран, АНУ-ын яриа хэлэлцээг сэргээхээр Тегеранд 12 гаруй цаг хэлэлцээ хийсэн бөгөөд Бямба гарагт Катар, Ираны төлөөлөгчид Дохад хэлэлцээгээ үргэлжлүүлж байна. Гэвч Ираны Тасним агентлагийн мэдээлснээр, Дохад Иран, АНУ-ын ирээдүйн хэлэлцээний тухай яриа байхгүй байна.