Европын холбоо Оростой эрчим хүчний харилцаагаа бараг бүрэн тасалсан гэж еврокомиссар Домбровскис мэдэгдэв

Оростой эрчим хүчний харилцаагаа таслах ажил «ерөнхийдөө дууссан» гэж Европын комиссын эдийн засгийн асуудал эрхэлсэн комиссар Валдис Домбровскис Блүүмберг агентлагт мэдэгджээ. Энэ тухай Ведомости сонин мэдээлэв.

Түүний хэлснээр, одоогоор бүс нутгийн эрчим хүчний гол нийлүүлэгчид нь Норвеги, АНУ юм. Холбоо голчлон байгалийн хийн нийлүүлэлтээ төрөлжүүлэхэд хөрөнгө оруулж, сэргээгдэх эрчим хүчийг нэвтрүүлж, эрчим хүчний хэмнэлтийг нэмэгдүүлсэн нь өнөөдөр тогтвортой байдалд нь тусалж байна гэж Домбровскис хэлжээ.

Блүүмбергийн бичсэнээр, ЕХ-ны цахилгааны үйлдвэрлэлд ногоон эх үүсвэрийн эзлэх хувь 2022 онд 39 хувь байсан бол 2025 онд 47 хувьд хүрч, хийн үнийн өсөлт цахилгааны үнэд үзүүлэх нөлөөг зөөлрүүлжээ.

Ай Эн Жи банкны ахлах эдийн засагч Марике Бломын тооцоолсноор, өрхүүд ч Украины мөргөлдөөнөөс өмнөх үетэй харьцуулахад хийн нийт хэрэглээг 15 орчим хувиар бууруулахад хувь нэмэр оруулжээ.

Германы Фюнфцих Херц цахилгаан дамжуулах сүлжээний компанийн тэргүүн Штефан Капферерийн хэлснээр, бизнес эрхлэгчид эрчим хүчийг хямд үед ашиглаж сурсан бөгөөд аж үйлдвэрийн том батарей түгээмэл болохын хэрээр илүү их ашиг хүртэх юм. Тэрбээр уур гаргахад байгалийн хийн оронд илүүдэл цахилгаан ашигладаг химийн кластерийг шинэлэг шийдлийн жишээ болгожээ.

ТАСС агентлаг 10 дугаар сарын 30-нд арилжааны мэдээллийг иш татан, Европт байгалийн хийн биржийн үнэ 2022 оны 12 дугаар сараас хойш анх удаа 1000 шоо метр тутамд 1200 ам.доллараас давсныг мэдээлсэн юм.

Мөн өдөр Газпромын удирдах зөвлөлийн дарга Алексей Миллер өвөл хүйтэн байвал Европт хийн үнэ оргил үедээ 1000 шоо метр тутамд 2500 ам.долларт хүрч болзошгүй гэж мэдэгджээ.

Политико сонин 10 дугаар сарын 9-нд Европ өвөл хийн хомсдол, нийтийн үйлчилгээний төлбөрийн өсөлттэй тулгарч болзошгүй гэж бичиж байв.