Японы Инпекс компани Хормузын хүндрэлийг үл харгалзан Ойрхи Дорнодын газрын тосноос татгалзахгүй байна
Хормузын хоолойгоор тээвэрлэлт тасалдсанаас Абу Даби дахь далайн олборлолт хүндэрсэн ч хуурай газрын олборлолт хэвийн үргэлжилж байна.
Японы газрын тос, байгалийн хийн хамгийн том үйлдвэрлэгч Инпекс Хормузын хоолойгоор тээвэрлэлт олон сар тасалдсан ч Ойрхи Дорнод дахь үйл ажиллагаагаа үргэлжлүүлэхээр шийдсэнийг Нэшнл сонин мэдээлжээ.
«Бид олборлолтыг нэмэгдүүлэхийн тулд бусадтай хамтран чадах бүхнээ хийнэ» гэж Инпексийн Абу Даби дахь салбарын гүйцэтгэх захирал Масато Камия Адипек үзэсгэлэнгийн үеэр өгсөн ярилцлагадаа хэлжээ.
Камиягийн хэлснээр, Инпексийн тус эмират дахь хуурай газрын олборлолт хямралын үеэр огт тасалдаагүй ч далайн түүхий тосны үйл ажиллагаа хүндрэлтэй тулгарчээ. Тэрээр хүндрэлийн цар хүрээг тодруулаагүй.
Япон 2025 онд түүхий тосны импортынхоо 94 орчим хувийг Ойрхи Дорнодоос авсан тул АНУ, Израиль 2 дугаар сарын 28-нд Иран руу цохилт өгч эхэлснээр онцгой эмзэг байдалд орсон юм.
Тус улсын түүхий тосны импорт 4 дүгээр сард өдөрт 850 мянга орчим баррель болж буурсан нь 1979 онд бүртгэл хөтөлж эхэлснээс хойших хамгийн бага түвшин байв.
Япон 3 дугаар сараас төрийн нөөцөөсөө 80 сая баррель гаргаж эхэлсэн нь түүхэн дэх хамгийн их хэмжээ юм. Хямралын эхэнд тус улс 254 хоногийн хэрэглээтэй тэнцэх онцгой нөөцтэй байжээ.
Инпекс 1973 оноос Абу Дабигийн далайд газрын тос олборлож ирсэн. Тус компани дэлхийн хамгийн том далайн ордуудын нэг Дээд Закумын 12 хувь, Доод Закумын 10 хувийг 2058 он хүртэлх концессоор эзэмшдэг.
Инпексийн 2021 онд нээсэн хуурай газрын 4 дүгээр блокийн ашиглалтыг одоо Аднок гүйцэтгэж байгаа ч Инпекс 40 хувийн хувьцаагаа хэвээр эзэмшиж байна.
