Египетийн шүүх сэтгүүлч Лина Атталлагийн хэргийн дахин шүүх хурлыг хойшлуулжээ

Египетийн шүүх нэрт сэтгүүлч Лина Атталлагийн хэргийн дахин шүүх хурлыг 11 дүгээр сарын 18 хүртэл хойшлуулжээ гэж Африканьюс сайт мэдээлэв. Өмгөөллийн тал тэргүүлэгч шүүгчийг татгалзан гаргахыг хүсч байна.

Бие даасан Мада Маср мэдээллийн сайтын ерөнхий эрхлэгч Атталлаг тусгай зөвшөөрөлгүйгээр мэдээллийн сайт ажиллуулсан, худал мэдээлэл нийтэлсэн хэргээр буруутгаж байна. Тэрбээр 2024 онд өөрөө мэдээгүй байхад эзгүйд нь нэг жилийн хорих ял авч байжээ.

Шүүгч Атталлаг буруутай гэсэн байр суурьтай болсон гэж түүний өмгөөлөгч үзэж байна.

Мөн энэ шүүгч өнгөрсөн сард өөр хэргээр Атталлаг гурван сая египет фунтээр торгож, Мада Масрыг хаах шийдвэр гаргасан нь маргааныг улам хурцатгажээ.

Хил хязгааргүй сурвалжлагчид байгууллага шүүх ажиллагааг буруушаасан бол Сэтгүүлчдийг хамгаалах хороо уг сайтыг хаасан шийдвэрийг цуцлахыг Египетийн эрх баригчдаас шаардаж байна.

Мада Маср олон жилийн турш тусгай зөвшөөрөл хүссэн өргөдөл гаргасан ч хариу аваагүй гэж Атталла хэлжээ. Зохицуулалтыг хяналтын хэрэгсэл болгон ашиглаж байна гэж тэрбээр үзэж байна.