Ерөнхийлөгчийн мэдээлэл алдагдсан Вирус Тотал платформыг ашигладаггүй гэж Солонгосын ихэнх байгууллага хэлжээ

Өмнөд Солонгосын төрийн ихэнх байгууллага ерөнхийлөгч Ли Жэ Мён, түүний гэргийн хувийн мэдээлэл ил болсон Вирус Тотал платформыг ашигладаггүй гэж хариулсан гэж Кореа Таймс сонин мэдээлэв.

Платформд 6 дугаар сард Европт айлчлах үеэр ерөнхийлөгчийн онгоцонд явсан 168 хүний мэдээлэл ойролцоогоор таван сарын турш байршиж байжээ. Эдгээрийн дунд Ерөнхий сайд Хан Сон Сук, Үндэсний аюулгүй байдлын зөвлөх Ви Сон Рак, хамгаалалтын ажилтнууд болон сэтгүүлчид бий.

Гүүгл компанийн эзэмшдэг Вирус Тотал 70 гаруй вирусын эсрэг хөдөлгүүрээр файл шалгадаг. Нийтийн хэсгээр оруулсан файлыг аюулгүй байдлын компаниудтай хуваалцдаг. Захиалагч байгууллагууд ч үзэх боломжтой аж.

«Энэ хэрэг гарсны дараа анх удаа сонссон» гэж Гадаад хэргийн яамны нэгэн албан тушаалтан платформын талаар хэлжээ.

Ерөнхийлөгчийн алба Чонвадэ тодорхой хариу өгөөгүй, Батлан хамгаалах яам ашиглаж буй эсэхээ баталгаажуулаагүй байна. Өвчний хяналт, урьдчилан сэргийлэх агентлаг платформыг ашигладаггүй ч ажилтнууд хувиараа хэрэглэсэн эсэхийг бүрэн мэдэх боломжгүй гэжээ.

Мэдээллээр Гадаад хэргийн яам нэгэн ажилтнаа шалгаж байгаа бөгөөд засгийн газар наад зах нь нэг албан тушаалтан хор санаагүйгээр, буруу шийдвэрээс болж алдсан гэж сэжиглэж байна.

Сэжиг мөн яамны дотоод системийг хянадаг гэрээт компанид тусчээ. Файл энэ компаниар дамжсан шинж тэмдэг илэрсэн. Компани файлыг платформд байршуулсан байж магадгүй гэсэн мэдээлэл бий. Вирус Тотал сонины асуултад хараахан хариу өгөөгүй байна.