Европын холбоо Duolingo, Strava зэрэг аппын донтуулах функцийг хязгаарлахаар төлөвлөж байна

Европын комисс Дижитал шударга байдлын тухай хуулийн төслийг танилцууллаа. Төсөл нь хэрэглэгчдийг аппад илүү их цаг зарцуулахад түлхдэг зэрэг “хортой дижитал практик” бүхий функцээс хамгаалах зорилготой.

Гадаад хэл заадаг Duolingo платформ, тамирчдад зориулсан Strava үйлчилгээ болон бусад алдартай апп хуулийн үйлчлэлд хамрагдаж болзошгүйг Wired сэтгүүл бичжээ.

Төслийг боловсруулагчдын үзэж байгаагаар, эдгээр аппын хэрэглэгчид ахицаа алдахгүйн тулд одоо тасралтгүй үргэлжлүүлэх ёстой дараалсан хичээл, дасгалын цувралаас татгалзах боломжтой болох ёстой.

Европын комисс мөн “түрэмгий мэдэгдэл”, “сэтгэл санааны дарамт” зэрэг хэрэглэгчийг татан оролцуулах механизмыг хэрэглэгчид өөрсдөө амархан унтраадаг болгохоор зорьж байна. Duolingo зэрэг зарим апп хичээллэх хэрэгтэйг хэрэглэгчдэд дахин дахин сануулж, суралцах эсвэл дасгал хийх дургүй байгаа хүнийг ичээхийг оролддог.

Түүнчлэн хуулийн төсөлд хэрэглэгчийн чөлөөтэй, ухамсартай шийдвэр гаргах чадварыг гажуудуулдаг, “харанхуй хэв загвар” гэгддэг шударга бус арилжааны аргыг хориглохоор тусгажээ.

Урамшуулал удахгүй шатах, хямдрал дуусах гэж байна гэсэн зар үүнд хамаарна. Хэрэглэгчийг хамгийн үнэтэй бараа, үйлчилгээ худалдан авахад чиглүүлэн сонголтыг нь гажуудуулах, захиалгаа цуцлахад зориуд саад учруулах нь ч мөн ийм аргын жишээ юм.

Хууль батлагдвал аппууд “хортой дижитал практик” гэж тооцогдох функцийг унтраах боломжийг хэрэглэгчдэд олгох ёстой болно.

Зөрчил гаргасан компаниудад дэлхий даяарх жилийн борлуулалтынх нь 6 хувь хүртэлтэй тэнцэх торгууль ногдуулахыг санал болгож байна.