Зептовселенээс ирсэн дохио харанхуй материйг илрүүлэхэд ойртуулж байна

Кембрижийн судлаачид Том адрон коллайдер дээр зептовселен хэмээх атомаас 100 дахин жижиг хэмжээний ертөнцөөс дохио бүртгэжээ гэж Би Би Си мэдээлэв.

Энэ нээлт орчлон ертөнцийн шинэ, илүү бүрэн онол боловсруулахад тусалж болох юм гэж эрдэмтэд үзэж байна.

Судлаачид мөргөлдөөнөөс гарсан б-кваркийн бусад жижиг бөөмстэй харилцан үйлчлэхийг зептометрийн хэмжээнд бүртгэсэн байна. Тэр хэмжээнд бөөмс харанхуй материд илүү мэдрэмтгий байж болох гэсэн онол бий.

«Бид энэ зептовселенийн хаалгыг тогшиж байна» гэж өгөгдлийн шинжилгээг удирдсан Кембрижийн их сургуулийн доктор Гарри Клифф хэлжээ.

Төсөлд оролцогч 28 улс детекторыг шинэчлэхээр тохирсон бөгөөд 300 сая орчим ам.доллар зарцуулж, бүртгэх давтамжийг арав дахин нэмэгдүүлэх аж.

Гэвч Их Британийн судалгааны агентлаг өнгөрсөн жил шинэчлэлтийн өөрийн хувь хөрөнгөө буцаасан юм.

«Их Британи хоцорч, үнэхээр чухал нээлт хийх боломжийг алдах эрсдэл бий» гэж олон улсын хамтын ажиллагааны удирдагч Тим Гершон хэлсэн байна.

Агентлагийн мэдээлснээр, Их Британи Европын цөмийн судалгааны байгууллагын бүрэн эрхт гишүүн хэвээр, жилд 175 сая орчим фунт стерлинг (235 сая орчим ам.доллар) төлдөг хоёр дахь том донор юм.