Зорчигчдоо Камбожид буулгасан АНУ-ын аялалын хөлөг ажилтнуудтайгаа хөдлөв

203 зорчигчоо Камбожид буулгасан АНУ-ын Одиссей аялалын хөлөг Сиануквилл боомтоос зөвхөн ажилтнуудтайгаа хөдөлсөн гэж Камбожийн албаны хүмүүс Лхагва гарагт хэлснийг Си Би Эс Ньюс телевиз мэдээлэв.

Зорчигчдод 10 дугаар сарын 28-нд хэдхэн цагийн дотор буухыг мэдэгдсэн байна.

Флоридад төвтэй Вилла Ви Резиденсес компани түлшний үнэ огцом өссөн тул аяллаа зогсоожээ. Зарим зорчигч өрөөнийхөө төлөө 300,000 гаруй ам.доллар төлсөн гэж хэлсэн аж.

Си Би Эс Ньюсийн мэдээлэгчдийн хэлснээр хөлгийг Сингапурт аваачиж, дуудлага худалдаанд оруулж магадгүй юм.

«Энэ бол 30-90 хоногийн үйл явц бөгөөд энэ хугацаанд бид бүтцийн өөрчлөлт хийх цаг гаргана» гэж компанийн үүсгэн байгуулагч Майк Петтерсон хэлсэн байна.

Сиануквиллд 100 шахам зорчигч үлдсэн бөгөөд телевизийн харсан дотоод мэдээллээр компани дор хаяж гурван сарын турш санхүүгийн хүндрэлтэй байжээ.