Африкийн есөн оронд шар чичрэгийн 67 тохиолдол бүртгэгдэж, 18 хүн нас баржээ
Баруун Африкт шар чичрэгийн халдвар тархаж, хил дамнасан хөдөлгөөн болон вакцинжуулалтын хамрагдалт жигд бус байгаа нь эрсдэлийг нэмэгдүүлж байна.
Нигери болон Африкийн өөр найман оронд 2026 оны 1 дүгээр сараас 10 дугаар сарын хооронд шар чичрэгийн 67 тохиолдол батлагдаж, тэдгээрээс 18 нь нас барсныг Дэлхийн эрүүл мэндийн байгууллага мэдээлсэн гэж Премиум Таймс сонин бичжээ.
Халдвар бүртгэгдсэн орнууд нь Буркина Фасо, Камерун, Төв Африкийн Бүгд Найрамдах Улс, Кот-д'Ивуар, Гана, Гвиней, Либери, Нигери, Того юм.
Хамгийн олон тохиолдол Кот-д'Ивуарт бүртгэгдэж, 30 хүн халдвар авснаас 10 нь нас баржээ. Буркина Фасод 15 тохиолдол, гурван нас баралт, Камерунд есөн тохиолдол, нэг нас баралт гарсан байна.
Нигери, Гана тус бүр дөрвөн тохиолдол бүртгүүлсний Нигерт нэг, Ганад гурван хүн нас баржээ. Төв Африкийн Бүгд Найрамдах Улсад хоёр, Либери, Гвиней, Того тус бүрд нэг тохиолдол илэрсэн байна.
Хил дамнасан байнгын хөдөлгөөн, вакцинжуулалтын жигд бус хамрагдалт, халдвартай шумуул тархахад тохиромжтой орчин нөхцөл халдвар цааш тархах эрсдэлийг нэмэгдүүлж байна гэж ДЭМБ анхааруулжээ. Ойн бүс, уул уурхай, хөдөө аж ахуйд ажилладаг хүмүүс эрсдэл өндөртэй аж.
ДЭМБ 10 дугаар сарын 27-нд Африкийн бүс нутагт нийгмийн эрүүл мэндийн эрсдэлийг дунд зэрэг, дэлхийн хэмжээнд бага гэж үнэлжээ.
«Хүнд үе шатанд орсон өвчтөнүүдийн тал орчим нь долоогоос 10 хоногийн дотор нас бардаг» гэж байгууллага тэмдэглэжээ. ДЭМБ-ын мэдээлснээр халдвар авсан хүмүүсийн 15 орчим хувь нь хүнд хэлбэрээр өвддөг.
Шар чичрэгийг эмчлэх тусгай вирусын эсрэг эм байдаггүй ч нэг тун вакцин насан туршийн дархлаа олгодог. ДЭМБ эрсдэлтэй бүс рүү зорчих есөн сар ба түүнээс дээш насны аялагчдыг вакцин хийлгэхийг зөвлөжээ.
