Алиев Туркт болох Түрэг улсуудын байгууллагын дээд хэмжээний уулзалтад оролцохгүй

Азербайжаны Ерөнхийлөгч Ильхам Алиев аравдугаар сарын 29-30-нд Туркт болох Түрэг улсуудын байгууллагын дээд хэмжээний уулзалтад ажлын хуваарь ачаалалтай байгаа тул оролцохгүй. Энэ тухай Интерфакс агентлаг Азербайжаны мэдээллийн агентлагийг иш татан мэдээлэв.

Мэдээллээр Алиев аравдугаар сарын 30-нд Бакуд анх удаа болж буй өсвөрийн хөлбөмбөгийн дэлхийн аварга шалгаруулах тэмцээний шагнал гардуулах ёслолд оролцох бөгөөд уулзалтад Азербайжаныг Гадаад хэргийн сайд Жейхун Байрамов төлөөлнө.

Сүүлийн үед Баку, Анкарагийн харилцаанд тодорхой хурцадмал байдал ажиглагдаж байгаа юм. Азербайжаны Сайд нарын кабинет есдүгээр сард улсын сургуулийн сурагчдын гадаад үзэмжийн журамд өөрчлөлт оруулж, дүрэмт хувцасны нэгдсэн стандартыг зөрчсөн эсвэл сургалтын шашингүй шинжид нийцэхгүй хувцас өмсөхийг хориглосон байна.

Үүний хариуд Туркийн эрх баригч намын зарим төлөөлөгч Бакуг хатуу шүүмжилж, шийдвэрээ эргэн харахыг уриалжээ. Азербайжаны эрх баригч «Ени Азербайжан» нам Туркийн Шударга ёс, хөгжлийн намыг хоёр орны харилцаанд хор хөнөөл учруулж болох мэдэгдлээс татгалзахыг уриалсан бөгөөд Баку Туркийн эрх баригч хүрээний үйлдлийг дотоод хэрэгт хөндлөнгөөс оролцсон гэж үзэж байна.

Мөн Азербайжаны Ерөнхий прокурорын газар засгийн эрхийг хүчээр өөрчлөхийг уриалж, шашны үзэн ядалтыг өдөөсөн хэргээр Туркийн найман иргэнийг олон улсад эрэн сурвалжилж, Гадаад хэргийн яам Туркийн 31 иргэнийг хүсээгүй этгээдийн жагсаалтад оруулж, тус улсад нэвтрэхийг хориглосон байна.