Саша Барон Коэн «Борат» киноныхоо төлөө Казахстанаас олон нийтийн өмнө уучлалт гуйжээ

Британийн жүжигчин Саша Барон Коэн 2006 оны «Борат» киноны дүрийн төлөө Казахстаны ард түмнээс олон нийтийн өмнө уучлалт гуйжээ. Энэ тухай Медуза сайт мэдээлэв.

«Би Казахстаны ард түмнээс анх удаа уучлалт гуймаар байна. Учир нь Борат Казахстантай ямар ч холбоогүй» гэж жүжигчин нэгэн подкаст нэвтрүүлэгт хэлжээ.

Коэны тайлбарласнаар энэ дүр анх Би Би Си-гийн инээдмийн шоунд гарч ирсэн бөгөөд дараа нь аль телевиз шоуны төлбөрийг төлж байгаагаас хамааран нэр, үндэс угсаа нь өөрчлөгддөг байжээ. Тэрбээр нэгэн үе Казахстаныг «хэн ч юу ч мэддэггүй газар» гэж сонгосон бөгөөд казах аялга ямар сонсогддогийг ч мэддэггүй гэдгээ дахин хэлсэн байна.

Энэ нь Коэн өөрийн бүтээсэн дүрийн төлөө анх удаа уучлалт гуйж буй хэрэг юм. Казахстаны Гадаад хэргийн яам 2005 онд Коэныг шүүхэд өгнө гэж сүрдүүлж, түүний шоуг Казахстаныг гутаах «улс төрийн захиалга» гэж тайлбарлаж байсан. 2006 онд киног гарахын өмнөхөн тус улсын эрх баригчид Америкийн томоохон сонинуудад Казахстаны амжилтын тухай дөрвөн хуудас сурталчилгааны хавсралт нийтлүүлжээ.

Цаг хугацааны явцад Казахстанд Боратад илүү тайван хандах болсон бөгөөд 2017 онд Астанад Боратын дүрээр алхсан Чехийн жуулчдыг бага хэмжээний торгууль ногдуулсан бол 2020 онд тус улсын аялал жуулчлалын байгууллага Боратын алдарт хэллэгийг улсынхаа албан ёсны сурталчилгааны уриа болгон ашигласан юм.

Харин 2020 оны арваннэгдүгээр сард Америкийн казахуудын холбоо Боратын тухай хоёр дахь киног Оскар, Алтан бөмбөрцөг зэрэг шагналын нэр дэвшигчдийн жагсаалтаас хасахыг уриалж байжээ.