Амьжиргааны өртөг өсөж, орлого тогтворгүй байгаагаас болж хоёр дахь хүүхэд хүсэх япон эцэг эхчүүд цөөрчээ

Хүн ам нь буурч буй Японд хоёр дахь хүүхэдтэй болохыг хүсэх эцэг эхчүүд цөөрсөөр байна. Мэйжи Ясүда амьдралын даатгалын компани 2026 оны есдүгээр сард 0-ээс 6 насны нэг хүүхэдтэй 1100 эрэгтэй, эмэгтэйгээс хоёр дахь хүүхдийн талаарх төлөвлөгөөг нь асуусан байна.

Оролцогчдын ердөө 28.2 хувь нь хоёр дахь хүүхэдтэй болохыг хүсэж байгаагаа хэлсэн нь 2020 оны 56.9 хувийн талаас ч бага байна. 2020 оны үзүүлэлт судалгааг 2018 онд эхлүүлснээс хойших хамгийн өндөр түвшин байв.

Хоёр дахь хүүхэд хүсэж байгаа ч хэцүү гэж үзсэн, эсвэл огт хүсээгүй оролцогчдын нэрлэсэн хамгийн түгээмэл шалтгаан нь ирээдүйн орлогын талаарх санаа зовнил байв. Тэдний 54.5 хувь нь үүнийг дурджээ. Харин 66.4 хувь нь нөхцөл байдал сайжирвал хоёр дахь хүүхэдтэй болох талаар бодож үзнэ гэж хариулсан байна.

Ямар нөхцөлд хоёр дахь хүүхэдтэй болох талаар бодох вэ гэсэн асуултад оролцогчид өрхийн орлого нэмэгдэх (60.4 хувь), инфляц буурах (22.9 хувь) зэргийг нэрлэсэн байна.

Оролцогчдын 80 орчим хувь нь инфляцын улмаас хүүхэд өсгөх зардал ихээхэн дарамт болсон гэж хариулжээ. Хамгийн их дарамт болж буй зардалд хоол хүнс (44.6 хувь), хичээлээс гадуурх сургалт (34.9 хувь), цэцэрлэг, хүүхэд асрах газрын төлбөр (32.8 хувь) багтаж байна.

Судалгаагаар нэг хүүхэд өсгөх сарын дундаж зардал 43356 иен болж, өмнөх оныхоос 5.3 хувиар өссөн байна.

“Энгийн тооцоогоор хоёр хүүхэд өсгөх жилийн зардал 1.03 сая иен орчим болж, өрхийн орон сууцны зардалд ойртож байна” гэж Мэйжи Ясүда судалгааны хүрээлэнгийн ахлах эдийн засагч Морита Юкихиро онцолжээ. Энэ нь хоёр дахь хүүхдийг санхүүгийн томоохон дарамт болгож байна гэж тэрбээр үзэж байна.

Өмнө нь ихэвчлэн боловсрол, хүүхэд асрах зардлыг хамгийн хүнд дарамт гэж үздэг байсан ч “өнөөдөр хүүхэдтэй гэр бүлүүд хоол хүнс болон бусад өдөр тутмын хэрэгцээний зүйл зэрэг амьжиргааны зардалд дарагдаж байна” гэж Морита хэлэв. Хүүхэд өсгөж буй гэр бүлүүдийг дэмжихэд инфляцыг хязгаарлах нь чухал гэж тэрбээр хэлсэн байна.