АНЭУ-д дотоодоос авсан эдээр эвэрлэг бүрхэвч шилжүүлэн суулгах анхны мэс засал хийжээ

АНЭУ-д дотоодоос авсан эдээр хийсэн эвэрлэг бүрхэвч шилжүүлэн суулгах анхны мэс заслын дараа 74 настай Иорданы иргэн ертөнцийг илүү гэгээлэг харах болжээ.

Өмнө нь АНЭУ-д ийм мэс засал хийгдэж байсан ч гадаадаас авсан донор эд ашигладаг байжээ.

Ясин Абдел Мажид Алабдалатын харааг сэргээхэд Абу Дабигийн биобанк донор эд нийлүүлж, Bascom Palmer нүдний хүрээлэн мэс заслын мэргэжлийн туслалцаа үзүүлжээ. Түүнд өнгөрсөн жил Иорданд болор цайлтын мэс засал хийлгэсний дараа өвдөлттэй хүндрэл үүссэн байв.

Анхны мэс заслын улмаас эвэрлэг бүрхэвч нь хавдаж цэврүүтдэг буллёз кератопати үүсч, хараа нь бүрэлзэн, гэрэлд мэдрэг болсон байна. Хэдэн сарын дараа линзийг дахин байрлуулахын тулд баруун нүдэнд нь хоёр дахь мэс засал хийх шаардлагатай болжээ.

Аравдугаар сарын 20-ны мэс заслаас хойш Алабдалат сайн эдгэрч, хараа нь бараг бүрэн сэргэж байна.

“Өвдөлт долоо хоногт хоёр гурван өдөр гардаг байсан бөгөөд түүнийг намдаахын тулд би юу ч хийж чаддаггүй байлаа” гэж Абу Дабид эхнэр, хүүтэйгээ амьдардаг Алабдалат хэлжээ.

“Өглөө мэс засал хийлгээд, үдээс хойш гэртээ харьсан. Өвдөлт арилж, хараа маань сайжирсан… Анхны үзлэгт хол зайнаас таван хурууг бүгдийг нь харж чадсан. Ертөнц илүү гэгээлэг, өнгөлөг болж, байгалийг илүү сайн мэдэрдэг болсон” гэж тэрбээр ярив.

Эвэрлэг бүрхэвч шилжүүлэн суулгах нь хараа сэргээж чадах ч донор эд хомс байдаг. Абу Дабигийн Эрүүл мэндийн газар, M42 хоёрын шинэ түншлэл энэ байдлыг өөрчилж болох бөгөөд Абу Дабигийн биобанкны нүдний банк 2027 оны эхний улиралд импортын донор эвэрлэг бүрхэвчийг боловсруулж эхэлнэ.

2016 онд JAMA Ophthalmology сэтгүүлд нийтлэгдсэн дэлхий нийтийг хамарсан судалгаагаар 70 эвэрлэг бүрхэвч хэрэгтэй байхад ердөө нэг донор эвэрлэг бүрхэвч ногддог байжээ. Есдүгээр сард нийтлэгдсэн, дэлхийн хүн амын 89.5 хувийг төлөөлөх 122 орныг хамарсан өөр нэг судалгаагаар 2022 онд 214299 эвэрлэг бүрхэвч шилжүүлэн суулгасан нь арван жилийн дотор 16.1 хувиар өссөн үзүүлэлт юм.

“Эвэрлэг бүрхэвчийн хараагүй өвчтөний хувьд мэс засал саад болох нь ховор, саад нь эд л байдаг. Абу Дабид нүдний банк байна гэдэг нь донор эдийг энд, өвчтөн болон мэс засалчдад ойрхон боловсруулж, чанарыг нь баталгаажуулан, олгох боломжтой гэсэн үг” гэж Bascom Palmer нүдний хүрээлэнгийн гүйцэтгэх захирал, доктор Зайн Кендериан хэлэв.