АНЭУ-ын Лэндмарк групп Шукран урамшууллын хөтөлбөрийн мэдээлэл алдагдсан хэргийг шалгаж байна
Харилцагчдын нэр, холбоо барих мэдээлэл, төрсөн огноо өртсөн ч картын мэдээлэл алдагдаагүй гэж компани мэдэгджээ.
Дубайд төвтэй Лэндмарк групп Шукран урамшууллын хөтөлбөрийн системд зөвшөөрөлгүй нэвтэрсэн кибер халдлагыг шалгаж байгаагаа Лхагва гарагт мэдэгджээ. Энэ тухай Зэ Нэшнл сонин мэдээлэв.
Компанийн мэдээлснээр, дебит, кредит картын мэдээлэл системд хадгалагддаггүй тул алдагдаагүй бөгөөд Шукран оноонд ч нөлөөлөөгүй байна.
“Бид саяхан манай нэг системд зөвшөөрөлгүй нэвтэрсэн тохиолдлыг илрүүлж, шууд хязгаарласан” гэж компани мэдэгджээ. Компани холбогдох байгууллага, хууль сахиулах байгууллагад мэдэгдэж, хэргийг идэвхтэй шалгаж байгаа юм.
Лэндмарк халдлага хэр ноцтой болохыг тодруулаагүй ч энэ талаар компаниас мессеж хүлээн авсан харилцагчид өртсөн байж болзошгүй гэжээ. Тус групп Макс, Сплаш, Сентрпойнт зэрэг 20 гаруй брэндтэй, Персийн булангийн бүх орон болон Египет, Иордан, Энэтхэг, Малайз, Индонезид үйл ажиллагаа явуулдаг юм.
Ай Би Эм компанийн хамгийн сүүлийн тайланд дурдсанаар, энэ онд Ойрхи Дорнодын байгууллагуудад мэдээлэл алдагдлын дундаж зардал 8 сая ам.долларт хүрсэн бөгөөд алдагдсан бизнесийн зардал дунджаар 3.57 сая ам.доллар байжээ.
АНЭУ-ын кибер аюулгүй байдлын тэргүүн Мохамед Аль Кувейти 9 дүгээр сарын нэгэн Мягмар гарагт тус улс 640,000 халдлагад өртсөнийг мэдэгдсэн юм.
