Эухенио Чакарра Дубайд шүтээн Рори Макилройтой аваргын төлөө тулахад бэлэн байна
Чакарра Энэтхэгт Макилройг ялсан туршлагадаа тулгуурлан түүнтэй тэнцүү өрсөлдөж чадна гэдэгтээ итгэлтэй байна.
Испанийн 26 настай гольфчин Эухенио Чакарра Дубайн уралдааны чансааг 500 гаруй онооны зөрүүтэйгээр тэргүүлж, улирлын төгсгөлийн аваргын тэмцээнд шүтээн Рори Макилройтой тулахаар бэлтгэж байна. Энэ тухай Зэ Нэшнл сонин мэдээлэв.
Чакарра энэ улиралд 3 удаа түрүүлж, 2 удаа хоёрдугаар, 2 удаа гуравдугаар байр эзэлжээ. Тэрбээр өнгөрсөн сард Энэтхэгт Макилрой оролцсон тэмцээнд түрүүлсэн юм.
“Рори Макилрой хэр сайн гэдгийг бид мэднэ, тэр бол миний шүтээнүүдийн нэг” гэж Чакарра тэмцээний өмнөх өдөр хэлжээ. Тэрбээр Энэтхэгт Макилройг аль хэдийн ялсан тул түүнтэй өрсөлдөж, ялж чадна гэдгээ өөртөө сануулах хэрэгтэй гэсэн байна.
Хоёр тамирчин Пүрэв гарагт өдрийн 12.40-д сүүлийн хэсэгт тоглож эхлэх бөгөөд хоёр дахь долоо хоног дараалан хамт тоглох юм. Долоо хоногийн өмнө Абу Дабид Макилрой дүрэм зөрчсөн хэргээр 2 цохилтоор торгуулсан ч гуравдугаар байрт орсон бол Чакарра 22 дугаар байрыг хуваалцжээ.
Макилрой энэ талбайд урьд нь гурван удаа түрүүлсэн юм. “Сайн тоглож, их амжилт гаргаж байсан газартаа эргэн ирж байна” гэж тэрбээр хэлжээ.
Макилрой энэ долоо хоногт тус талбайд дөрөв дэх удаагаа түрүүлбэл дээд амжилттай тэнцэх найм дахь удаагийн улирлын аваргын цол хүртэх нь баталгаатай болно.
