Киргиз 2027 оны намар Жалал-Абадад шинэ нисэх онгоцны буудал нээхээр төлөвлөжээ
Хятад-Киргиз-Узбекистаны төмөр зам шинэ нисэх буудлыг ачааны төв болгоход тусална гэж Киргизийн нисэх буудлуудын удирдлага үзэж байна.
Киргиз Жалал-Абад мужид шинэ олон улсын нисэх онгоцны буудал, Бишкекийн ойролцоо ачааны терминал барьж, агаарын ачаа тээврийн хүчин чадлаа нэмэгдүүлэхээр төлөвлөжээ. Энэ тухай Таймс оф Сентрал Эйша сайт мэдээлэв.
Шинэ нисэх буудал Хятад-Киргиз-Узбекистаны төмөр замын чиглэлийн ойролцоо 2027 оны намар нээгдэх төлөвтэй байна. Киргизийн нисэх онгоцны буудлууд компанийн удирдах зөвлөлийн дарга Манасбек Самидинов 11 дүгээр сарын 11-нд барилгын урьдчилсан өртгийг 60 сая ам.доллар гэж мэдэгджээ.
Төсөлд 3,600 метрийн хөөрч буух зурвас, 2 явгалах зам, 4 онгоц байрлах талбай, 12,000 хавтгай дөрвөлжин метрийн зорчигчийн терминал багтана. Эхэндээ дотоодын нислэг үйлдэж, дараа нь гадаадын агаарын тээврийн компаниудтай олон улсын чиглэлийн талаар хэлэлцэх юм.
Самидиновын хэлснээр, жилд 15 сая тонн хүртэл ачаа тээвэрлэх зориулалттай, Хятадын Кашгарыг Узбекистаны Андижантай холбох төмөр зам нисэх буудлыг ачааны төв болгоход тусалж магадгүй юм. Төмөр замын барилгын ажил 2024 оны 12 дугаар сард албан ёсоор эхэлсэн бөгөөд Киргизийн хэсгийн өртөг 4.7 тэрбум ам.доллар гэж тооцогджээ.
Бишкекийн ойролцоох Манас олон улсын нисэх онгоцны буудалд оператор өөрийн хөрөнгөөр гаалийн баталгаат агуулах, эм, түргэн муудах хүнс, аюултай ачааны тусгай агуулахтай 40,000 хавтгай дөрвөлжин метрийн ачааны терминал барихаар төлөвлөж байна.
Киргиз энэ тээврийн төлөө ачааны байгууламжтай Казахстан, Узбекистаны нисэх буудлуудтай өрсөлдөх шаардлагатай болно. Агаарын ачаа төмөр зам, авто тээврээс хамаагүй үнэтэй тул цаг хугацаа, үнэ цэнэ өндөртэй бараа тээвэрлэгчид гол хэрэглэгч нь болох магадлалтай юм.
