Нигерийн газрын тосны олборлолт 10 дугаар сард бага зэрэг буурчээ

Нигерийн түүхий газрын тосны олборлолт 10 дугаар сард өдөрт дунджаар 1.69 сая баррель болж, 9 дүгээр сарын 1.72 сая баррелиас бага зэрэг буурсныг тус улсын Газрын тосны олборлолтын зохицуулах комиссын мэдээлэлд дурдсан гэж Премиум Таймс сонин мэдээлжээ.

Сарын хамгийн өндөр олборлолт өдөрт 1.79 сая баррельд хүрч, хамгийн бага нь 1.6 сая баррель байв.

“Конденсатыг оруулахгүйгээр Нигери 10 дугаар сард өдөрт дунджаар 1.51 сая баррель түүхий газрын тос олборлосон нь ОПЕК-ийн тогтоосон 1.5 сая баррелийн 101 хувь юм” гэж комисс мэдэгджээ.

Мэдээллээс үзэхэд, Нигери 5 дугаар сард 1.53 сая, 6 дугаар сард 1.55 сая, 7 дугаар сард 1.51 сая, 8 дугаар сард 1.5 сая, 9 дүгээр сард 1.53 сая, 10 дугаар сард 1.51 сая баррель олборложээ. Сар бүрээр харьцуулбал олборлолт 1.7 хувиар буурсан байна.

Комисс сүүлийн саруудын тогтвортой олборлолтыг үйл ажиллагааны тогтвортой байдал сайжирч, ажиллах хугацаа уртасч, газрын тосыг илүү үр ашигтай тээвэрлэж байгаатай холбон тайлбарлажээ.

Терминалаар нь авч үзвэл, 10 дугаар сард Форкадос терминал өдөрт 318.49 мянган баррель олборлож тэргүүлжээ.