АНУ-д энэ онд улаанбурхны 5000 гаруй тохиолдол бүртгэгдэж, 35 жилийн дээд түвшинд хүрчээ

АНУ-д 2026 онд одоогоор улаанбурхны 5182 тохиолдол батлагдсан нь 1991 оноос хойших хамгийн өндөр үзүүлэлт болсныг Өвчин хяналт, сэргийлэх төвийн мэдээлэлд үндэслэн Аль Жазира телевиз мэдээлжээ.

Тохиолдлын 18 хувь нь таваас доош насны хүүхэд, 41 хувь нь 5-19 насныхан байна. Нийтдээ хүүхэд, өсвөр насныхан 59 орчим хувийг эзэлж, 4993 тохиолдол дэгдэлттэй холбоотой гарчээ.

Тохиолдлын тоо 2025 оны 2289-өөс хоёр дахин илүү байгаа бөгөөд цэцэрлэгийн хүүхдийн вакцинжуулалтын хамрагдалт 2019-2020 оны хичээлийн жилийн 95.2 хувиас 2025-2026 онд 92.4 хувь болж буурсан байна.

Төвийн мэдээллээр, 2026 онд улаанбурхнаас болж дөрвөн хүн нас барсан ч энэ тоо мужуудын мэдээлснээс бага байна.

Дэгдэлтэд хамгийн их өртсөн Пенсильвани мужийн Эрүүл мэндийн газар энэ онд зургаан хүн нас барж, 1487 тохиолдол бүртгэгдсэнийг мэдээлжээ. Наймдугаар сард тус муж вакцин хийлгээгүй хоёр хүн нас барсныг мэдээлсэн ч вакцинд эргэлздэг Эрүүл мэндийн сайд Роберт Кеннеди Жуниор эргэлзээ илэрхийлсний дараа төв тэднийг улсын тооноос хассан юм.

АНУ улаанбурхныг хорь гаруй жилийн өмнө устгасан гэж зарласан ч дэлхий даяар, ялангуяа вакцинд эргэлздэг нийгэмлэгүүд болон эрүүл мэндийн тусламжийн хүртээмж муу газруудад тохиолдол нэмэгдэж байна.