Тайландад шатахууны онцгой албан татварыг бууруулсан ч эрчим хүчний өртгийн хямрал гүнзгийрсээр байна

Тайландын засгийн газар Е20 газохолын онцгой албан татварыг литр тутамд 5.60 батаар, В20 биодизелийнхийг 5.50 батаар гурван сарын хугацаанд бууруулсан ч энэ арга хэмжээ бодит тусламж болж чадах эсэх нь эргэлзээтэй байгааг Бангкок Пост сонин мэдээлжээ.

Аравдугаар сарын 28-наас нэгдүгээр сарын 27 хүртэл хүчинтэй хөнгөлөлт нь шатахууны үнийг бууруулж, био түлшний түүхий эдийн эрэлтийг өдөөн тариаланчдад туслах зорилготой гэж Ерөнхий сайд Анутин Чарнвиракул мэдэгдсэн. Гэвч олон жолооч, тээвэрлэгч эдгээр түлшийг хөдөлгүүрт муу гэж үзэн хэрэглэдэггүй.

Эрчим хүчний яамны мэдээллээр, өдөрт В7 дизель 52 сая литр хэрэглэгддэг бол В20 зургаан сая литр байв. Үнийн хөнгөлөлтийн дараа В20-ийн борлуулалт өдөрт есөн сая, аравдугаар сарын 30-нд 10 сая литрт хүрчээ.

Газрын тосны сангийн цэвэр алдагдал арваннэгдүгээр сарын 1-ний байдлаар 107.203 тэрбум батад хүрч, өмнөх долоо хоногоос 1.751 тэрбум батаар нэмэгдсэн байна.

Крабигийн далдуу модны тариаланчдын хоршооны холбооны менежер Монтри На Накорн татварын бууралт далдуугийн үнэ, худалдан авалтыг мэдэгдэхүйц нэмэгдүүлээгүй, боловсруулах үйлдвэрүүд илүү ашиг хүртэнэ гэж үзжээ.

Гурван бүлэг даваа гарагт Засгийн газрын ордны өмнө жагсаал хийж, шатахууны үнийг литр тутамд 10 батаар, ялангуяа литр нь 41.79 бат байгаа В7-гийн үнийг бууруулахыг шаардах юм. Краби мужийн тосгоны дарга Мано Кхруэакэүгийн удирдсан цуваа 1000 тээврийн хэрэгсэлтэй нийслэлд ирэхээр зорьж байна.