АНУ-д улс даяар зогсоосон нислэгүүд дахин эхэллээ

Олон мянган нислэгийг газар дээр нь саатуулсан хөөрөлтийн хоригоо цуцалснаа АНУ-ын Холбооны нисэхийн захиргаа арваннэгдүгээр сарын 13-ны Баасан гарагийн орой мэдэгдлээ.

Агаарын хөдөлгөөний удирдлагын цамхагуудын харилцаа холбоо доголдсоноос болж улс даяар нислэг зогсох нь ховор тохиолдол юм. Энэ удаагийн зогсолт газар нутаг уудам тус улсын нислэгийн хөдөлгөөнийг бүхэлд нь үймүүлжээ. Засгийн газрын албаныхан үүнийг харилцаа холбооны томоохон доголдол болохоос “хорлонтой халдлага” биш гэдгийг онцолжээ.

Дөрвөн цаг гаруй үргэлжилсэн зогсолтын улмаас хэдэн арван мянган зорчигч гацаж, заримыг нь хөөрөхийн өмнөхөн онгоцноос буулгажээ. Агаарын тээврийн компанийн ажилтнууд ч юу болоод байгааг мэдэхгүй байсан бололтой.

FlightRadar24-ийн мэдээллээр Баасан гарагт 4.7 мянга гаруй нислэг цуцлагдаж, 10 мянган нислэг хойшилжээ. Бямба гарагийн 700 нислэгийг ч урьдчилан цуцалсан байна. Агаарын тээврийн компаниуд хуваариа сэргээхэд хэд хоног шаардагдаж магадгүй гэж нисэхийн шинжээчид үзэж байна.

АНУ-д заналхийлэл байгаа шинж тэмдэг алга гэж Дотоодын аюулгүй байдлын сайд Маркуэйн Маллин хэлжээ. “Энэ бол дахин нэг 9/11 биш” гэж тэрбээр хэлэв.

“Одоогийн байдлаар энэ нь бидний эсрэг хорлонтой халдлага байсан гэх шинж алга, одоохондоо бол зүгээр л харилцаа холбооны доголдол” гэж Маллин хэлэв. Гэхдээ албаныхан “одоогоор юуг ч үгүйсгэхгүй байна” гэж тэрбээр нэмж хэлжээ.

2001 оны 9/11-ний халдлагаас хойш АНУ-ын агаарын орон зайд ийм дохио зарласан нь ердөө хоёр дахь удаа юм.

2023 оны нэгдүгээр сард NOTAM системийн доголдлоос болж Холбооны нисэхийн захиргаа улс даяар нислэгийг зогсоож байв. Энэ систем нисгэгчдэд аюул, нисэх онгоцны буудлын өөрчлөлт зэрэг мэдээллийг өгдөг юм. Тэр удаагийн доголдол хоёр цаг хүрэхгүй үргэлжилсэн байна.