АНУ, Израилийн цохилтоос байгаль орчинд учирсан хохирлын нөхөн төлбөр авахыг Иран COP31-д хүсчээ

АНУ, Израилийн цохилтоос байгаль орчинд учирсан хохирлын нөхөн төлбөр авахыг Иран хүсэж байгааг тус улсын Ерөнхийлөгч Масуд Пезешкиан Анталья хотод болж буй COP31 уур амьсгалын бага хурлын үеэр Лхагва гарагт хэлжээ.

Энэ асуудал уур амьсгалын өөрчлөлттэй дэлхий нийтээрээ тэмцэж буй ажилтай холбоотой гэж тэрбээр онцолсон байна.

“Энх тайвны үеийн уур амьсгалын амлалт, дайны үеийн хариуцлагыг бодитой, утга учиртай холбож, цэргийн түрэмгийллээс байгаль орчинд учирсан хохирлыг баримтжуулан үнэлж, нөхөн төлбөрийн механизм боловсруулахыг бид олон улсын хамтын нийгэмлэгээс хүлээж байна” гэж Пезешкиан хэлэв.

Пезешкиан хоёр долоо хоног үргэлжлэх бага хурлын гурав дахь өдөр ээлж дараалан илтгэл тавьсан төрийн тэргүүнүүдийн нэг байв.

Олон улсын уур амьсгалын хэлэлцээрүүдэд баян орнууд хөгжиж буй орнуудад уур амьсгалын өөрчлөлтөд дасан зохицох, түүний үр дагаврыг даван туулахад нь зориулж олон тэрбум ам.долларын санхүүжилт олгохоор тусгасан байдаг. Гэвч цэргийн ажиллагаа байгальд хор хөнөөл учруулбал юу хийхийг эдгээр хэлэлцээрт заагаагүй.

АНУ, Израиль хоёрдугаар сарын сүүлээр Ираны эсрэг цэргийн ажиллагаа эхлүүлсэн юм. Ливан, Персийн булан руу тэлсэн мөргөлдөөний үеэр Ираны болон бүс нутгийн эрчим хүчний дэд бүтэц, тээврийн хөлөг онгоцнууд удаа дараа цохилтод өртжээ.

Иран ч Ормузын хоолойгоор зорчиж буй газрын тосны танкеруудад олон удаа халдсан байна.

Эдгээр цохилт, халдлага их хэмжээний газрын тос асгаруулах зэргээр байгаль орчинд хохирол учруулжээ.

Харин Ираны дайн дэлхийн нийт ялгарлыг бууруулсан байж магадгүй юм. Олон улсын эрдэмтдийн консорциумын Мягмар гарагт гаргасан тайланд дурдсанаар, мөргөлдөөний дараа шатахууны үнэ өндөр байгаа, сэргээгдэх эрчим хүчний хэрэглээ өргөжсөн зэрэг нь хэсэгчлэн нөлөөлж энэ онд дэлхий нийтийн хэмжээнд чулуужсан түлшний ялгарал бага зэрэг буурах төлөвтэй байна.