Өмнөд Африкт онлайн мөрийтэй тоглоомын компаниуд таамаглалын зах зээл нээхээр зэхэж байна

Өмнөд Африкт онлайн мөрийтэй тоглоомын салбараас үүсэлтэй хэд хэдэн компани таамаглалын зах зээл нээхээр зэхэж байна.

Ийм зах зээлд ирээдүйн үйл явдлын үр дүнд бооцоо тавьж, түүнийгээ бусадтай арилжих боломжтой.

Тус улсад онлайн мөрийтэй тоглоомын шинэ компаниуд аль хэдийн олноор гарч ирсэн. Эдгээрийн зарим нь тусгай зөвшөөрөлтэй, олонх нь зөвшөөрөлгүй ажилладаг бөгөөд голдуу спортын бооцоо, казиногийн тоглоом санал болгодог.

Таамаглалын зах зээлд бооцоо хүлээн авагч тал байдаггүй. Бооцоо тавигчид бие биедээ хожигддог. Платформууд өөрсдийгөө тэднийг хооронд нь холбож, шимтгэл авдаг зуучлагч гэж тайлбарладаг.

Жишээлбэл, Polymarket платформд Хелен Зилле Йоханнесбургийн дараагийн хотын дарга болох эсэхэд “тийм” эсвэл “үгүй” гэж бооцоо тавих боломжтой. Зөв таасан хүн төлсөн үнэ болон 1 ам.долларын хоорондох зөрүүг авна.

Оролцогчид бооцоогоо хооронд нь худалдаж болно.

Үнэ нь магадлалыг илэрхийлдэг гэж үздэг. Тухайлбал, 62 цент нь 62 хувийн магадлалтай тэнцэнэ.

Ийм таамаг, ялангуяа АНУ-ын улс төр, эдийн засгийн томоохон үзүүлэлтийн хувьд олон тохиолдолд гайхалтай оносон байдаг. Гэвч ийм зах зээл буруу сэдэл төрүүлэх, дотоод мэдээллийн үнэ цэнийг огцом өсгөх, хөрвөх чадвар дутагдах зэрэг олон эрсдэлтэй. Таамаглалын зах зээл “мэргэжлийн бус жижиглэн хэрэглэгчдэд бүтцийн хувьд хор хөнөөлтэй” болох нь аль хэдийн баримтаар нотлогдсон байна.

Дэлхийн хамгийн том таамаглалын зах зээл болох Kalshi-ийн үйл ажиллагааны 80 гаруй хувь, хоёрдугаарт ордог гэж үздэг Polymarket-ийн 40 гаруй хувь нь спортын бооцоо байдаг.

Өмнөд Африкт эдгээр платформд ердийн мөрийтэй тоглоомын зөвшөөрөл хэрэгтэй юу, эсвэл одоогоор тодорхойлогдоогүй өөр зөвшөөрөл хэрэгтэй юу гэдэгт олон хуульч, тэр ч байтугай салбарынхан өөрсдөө эргэлзэж байна. Норт-Вест мужийн мөрийтэй тоглоомын зөвлөл “бооцооны бирж” гэсэн тусгай зөвшөөрлийн шинэ ангилал бий болгосноороо “дураараа аашилсан” гэж буруутгагдаж байна. Үндэсний мөрийтэй тоглоомын зөвлөл энэ ангиллыг эсэргүүцэж байна.

Энэ маргаанд нэр нь шуугиантай баруун жигүүрийн тоймч, бизнесмэн Роб Херсов холбогдож байна. Тэрбээр Betmatch нэртэй таамаглалын зах зээл байгуулахаар оролдож байгаа юм.

Мөн тус улсын мөрийтэй тоглоомын зах зээлд тэргүүлэгч Hollywood Bets-ийн охин компани энэ онд BetfairSA бооцооны биржийг нээжээ. Брэнд, программын эрхийг Британийн Betfair-ээс авсан байна.

Криптовалютын Luno бирж Limitless компанитай хамтран зах зээл нээхээ зарласан ч бараг тэр дороо цуцалсан бололтой. “Бүтээгдэхүүн хүргэгдсэн хэлбэрээрээ Luno-гийн стратегид нийцээгүй” гэж Luno тайлбарлав.

Polymarket-ийн толгой компани Blockratize долдугаар сард Өмнөд Африкийн Компани, оюуны өмчийн комисст барааны тэмдгээ бүртгүүлсэн байна.

Зимбабвегийн технологийн бизнесмэн Виктор Мапунгагийн Predictions.Africa платформ нь StakeBoss мөрийтэй тоглоомын сайтын нэг хэсэг юм. Уг сайт Коморын арлуудын Анжуанаас олгосон зөвшөөрлөөр ажилладаг бөгөөд дотоодын зөвшөөрөлгүй бололтой тул Өмнөд Африкт хэрэглэх нь хууль бус байна. Уг платформд санал болгодог бооцоо бүгд Polymarket-ийнхыг яг хуулбарласан болохыг amaBhungane-ийн шалгалт харуулжээ.

Онлайн мөрийтэй тоглоом нийгэмд учруулж буй ноцтой хохирлыг ихэвчлэн хууль ёсны, тусгай зөвшөөрөлтэй компаниуд үүсгэж байгааг шалгалтад онцолжээ.