АНУ хямд цэргийн дрон үйлдвэрлэлээр Орос, Хятадыг гүйцэхийг оролдож байна

Орос, Хятад хямд цэргийн дронг сая саяар үйлдвэрлэж байхад АНУ тэдгээрийг олноор үйлдвэрлэх ажлыг бараг тэгээс эхлүүлж байна гэж Пентагоны инновацын хэлтсийн захирлын үүрэг гүйцэтгэгч Трэвис Мец мэдэгджээ. Энэ тухай Ведомости сонин Блүүмберг агентлагийг иш татан мэдээлэв.

Түүний хэлснээр, АНУ-д дрон үйлдвэрлэдэг «маш эрч хүчтэй» компаниуд бий ч аль нь ч үйлдвэрлэлээ мэдэгдэхүйц нэмэгдүүлэх боломжгүй байна.

Пентагон Батлан хамгаалахын сайд Пит Хегсетийн өнгөрсөн оны 7 дугаар сард эхлүүлсэн Дрон Доминанс хөтөлбөрийн дагуу 1.1 тэрбум ам.доллар орчмын гэрээ байгуулжээ. Зорилго нь 2027 оны эцэс гэхэд 250 мянга орчим дрон худалдан авах юм.

Хөтөлбөрийн эхний шатанд Пентагон 20 орчим нийлүүлэгчээс 11-ийг сонгож, 30 мянган дронд 150 сая ам.доллар хуваарилсан байна. Гэвч 9 дүгээр сарын дунд гэхэд гуравхан компани захиалгаа бүрэн биелүүлж, нэг дроны дундаж өртөг 5000 ам.доллар болжээ.

Гол бэрхшээлүүдийн нэг нь батарей, сойзгүй хөдөлгүүр, сэнс зэрэг хятад эд ангиас хамааралтай байдал юм. АНУ хятад эд анги ашиглахад улам хатуу хязгаарлалт тогтоож байгаа нь үйлдвэрлэгчдийг хүнд байдалд оруулж байна.

«Хятадаас хамаарал нь бүрэн тэг гэж хэлж буй хэн ч өөрийгөө хуурч байгаа байх» гэж дрон үйлдвэрлэгч Скайдио компанийн тэргүүн Адам Брай хэлжээ.

Агентлагийн тэмдэглэснээр, өндөр зардал, удаан боловсруулалт, бүтцийн үр ашиггүй байдалтай Пентагон өөрөө бас нэг саад болж байна. АНУ-ын Засгийн газрын хариуцлагын албаны үнэлгээгээр, худалдан авалтын удаан мөчлөгөөс болж арми нийлүүлэх үед аль хэдийн хуучирсан системийг зэвсэглэлдээ авах эрсдэлтэй аж.