Путинтэй хийсэн утасны яриаг ашигтай байсан гэж Финландын Ерөнхийлөгч Стубб үнэлэв

Финландын Ерөнхийлөгч Александр Стубб Норвегийн Ерөнхий сайд Йонас Гар Стёретэй хамт ОХУ-ын Ерөнхийлөгч Владимир Путинтэй хийсэн утасны яриагаа «ашигтай» байсан гэж үнэлжээ. Энэ тухай Интерфакс агентлаг мэдээлэв.

Стуббын хэлснээр, Абу-Дабид Орос хэрхэн ажиллах гэж байгааг Путинээс асуух боломж олдсон нь яриаг ашигтай болгосон аж. Тэрбээр Бямба гарагт Финландын Юле телерадиод ярихдаа, Оросын Ерөнхийлөгч цэргийн нөхцөл байдлыг хэрхэн харж байгаа талаар анх удаа шууд мэдээлэл авсан гэжээ.

Стубб энэ яриа барууны орнуудын шүүмжлэлд өртөж болзошгүйг хүлээн зөвшөөрсөн ч Финланд Европын холбооны нийтлэг бодлогоос хазайхгүй, Европ болон Умард Европын эв нэгдэлд хагарал гарахаас санаа зовохгүй байгааг онцолжээ.

Түүний хэлснээр, Орос, Украины асуудлаарх Европ, АНУ-ын бодлогод тодорхой нарийн ялгаа бий. Жишээлбэл, Европоос Оросын эсрэг баримталж буй хоригийн бодлого АНУ-ынхаас хамаагүй хатуу гэж тэрбээр онцолсон байна.

АНУ Орос, Украины хооронд энхийн зуучлагчийн үүрэг гүйцэтгэж, саяхан Оростой дизель түлшний хэлцэл байгуулсан нь ЕХ-д төсөөлшгүй зүйл гэж Стубб хэлжээ.

«Финланд зуучлагчийн үүрэг гүйцэтгэхгүй, харин Украиныг 100 хувь дэмжиж байна» гэж Стубб онцолсон бөгөөд үүнийгээ Путинд ч хэлсэн байна.

Стуббын үзэж буйгаар, Финландын гадаад бодлогын гол асуулт бол Орос, Украины талаарх АНУ-ын бодлого Финландын ашиг сонирхолд нийцэж байгаа эсэх юм. Хариулт нь заавал тийм биш бол юу хийхээ бодох хэрэгтэй бөгөөд энэ утгаараа яриа цаг үеэ олсон гэж тэрбээр үзжээ.