АНУ-ын арми Хятадын нууцлаг сансрын онгоцны тод зургийг нийтэлжээ

Редакцийн тайлбар: энэ мэдээг Америкийн дуу хоолойн хятад хэлний нийтлэлээс орчуулав.

АНУ-ын арми Хятадын нууцлаг, дахин ашиглах сансрын онгоц тойрог замд хиймэл дагуултай залгасан үеийг харуулсан тод зургийг нийтэлжээ.

2024 онд авсан энэ зураг АНУ-ын Батлан хамгаалахын тагнуулын газраас саяхан гаргасан «Сансрын аюулгүй байдалд тулгарч буй сорилтууд» тайлангийн шинэ дугаарт багтжээ. Нууц бус энэхүү тайланд сансар дахь «дайсны аюул заналхийллийг» үнэлж, Хятад, Орос, Иран, Хойд Солонгосын сансартай холбоотой зорилго, үйл ажиллагааг тодорхойлсон байна.

Зургийг АНУ-ын хувийн хиймэл дагуул, сансрын тагнуулын Вантор компани (хуучнаар Максар) авчээ. Зурагт Хятадын нисгэгчгүй сансрын онгоц хиймэл дагуултай ойртож байгаа нь харагдана. Хиймэл дагуулын нарны хавтангууд дэлгэгдсэн, онгоцны ачааны тасалгааны хаалга нээлттэй байна.

Тус газар энэ зургийг дахин ашиглах сансрын зөөгч хэрэгслийн тухай бүлэгт оруулжээ.

Тайланд дурдсанаар одоогоор зөвхөн АНУ-д ийм хэрэгслийн ажиллагаатай хөтөлбөр байгаа бөгөөд Хятад хоёр дахь орон болохыг зорьж байна.

Бээжин дахин ашиглах пуужингаас гадна сансрын онгоц бүтээж байгаа бөгөөд эдгээр нь адил дахин ашиглах боломжтой, маневр хийх чадвар нь илүү гэж тайланд дурджээ.

Тайланд дурдсанаар Хятад сансрын онгоцны хоёр үндсэн загвартай: Шэньлун, Тэнъюнь. Эдгээр нэр нь «Тэнгэрлэг луу», «Үүлэн дээр аялагч» гэсэн утгатай.

Аравдугаар сарын 26-нд гарсан тайланд Хятадын сансрын онгоцны гурван нислэгийг тодорхойлжээ. Эхнийх нь 2020 онд хоёр өдөр үргэлжилжээ. Хоёр дахь нь 2022 оны наймдугаар сард хөөрч, тойрог замд 276 өдөр, гурав дахь нь 2023 оны арванхоёрдугаар сард хөөрч, 268 өдөр байжээ. Саяхан Хятадын төрийн хэвлэл хоёрдугаар сард дөрөв дэх удаа хөөргөснийг мэдээлжээ.

Тайланд энэ сансрын онгоц Шэньлун эсвэл Тэнъюнь аль нь болохыг заагаагүй. Хятадын албан ёсны хэвлэл өмнө нь эдгээр нислэгийн талаар зөвхөн «дахин ашиглах туршилтын сансрын хөлөг» гэж бүрхэг дурдаж байв. Гэхдээ Урт марш пуужингаар босоо хөөргөдөг энэ онгоцыг дахин ашиглах, нисгэгчгүй Шэньлун гэж олон хүн үздэг. Хятадын албан мэдээллээр хэвтээ хөөргөлтийн шинэ технологи ашигладаг Тэнъюнь илүү туршилтын шатандаа явж байна.

Зарим ажиглагч Шэньлун онгоцыг Боинг компанийн АНУ-ын Сансрын хүчинд зориулан бүтээсэн, бие даан ажилладаг, дахин ашиглах, нисгэгчгүй Икс-37Би онгоцтой харьцуулдаг.

Тус газрын даргын үүргийг гүйцэтгэж байсан Дэвид Шедд энэ зургийг «том мэдээ» гэж Америкийн дуу хоолойд хэлжээ.

«Тагнуулын газрын нийтэлсэн зураг гайхалтай бөгөөд Хятад сансарт довтлох, хамгаалах чадвараа идэвхтэй сайжруулахыг зорьж буйг тодотгож байна» гэж тэрбээр цахим шуудангаар илгээсэн мэдэгдэлдээ бичжээ.

«Бүгд Найрамдах Хятад Ард Улсын сансар дахь эдгээр ахиц нь Америк батлан хамгаалах болон арилжааны салбарт манай хиймэл дагуулын бүлгүүдэд заналхийлж болзошгүй, бодитоор заналхийлэх Хятадын сансрын чадавхын томоохон ахицыг идэвхтэй сөрөн ажиллах ёстойг сануулж байна» гэж Шедд хэлэв.

Хятад, Орос, Иран, Хойд Солонгосын «хорон санаат оролдлого».

Америкийн Дайны яамны харьяа тус газар тайландаа АНУ болон холбоотнуудынх нь батлан хамгаалалтад аюул учруулж буй сансар дахь олон төрлийн заналхийллийг тоймлон дурджээ.

Тайланд Хятад болон өөр гурван орныг «аюулгүй, найдвартай, тогтвортой сансрын орчинд ихэвчлэн харшлах зан үйл гаргасан» гэж нэрлэсэн байна.

«Хятад, Орос, Иран, Хойд Солонгос сансрын чадавхаа бүх сансрын систем, тэдгээрийн өгөөжийн аюулгүй байдалд заналхийлэх байдлаар хөгжүүлж, туршиж, байршуулж, ашиглаж байна» гэж тайланд дурджээ.

Хятад, Орос болон «шинээр гарч ирж буй сансрын гүрэн» гэж нэрлэсэн Иран, Хойд Солонгосын «хорон санаат оролдлого» шинэ технологи хөгжүүлэхээс хальж, дипломат болон эдийн засгийн салбарт хүрсэн гэж тайланд тэмдэглэжээ.

Хятадын Засгийн газар шинэ тайланд тусгайлан хариу өгөөгүй байна. Бээжин сансрыг зэвсэгжүүлэхийг эсэргүүцдэг гэж мэдэгдэж ирсэн юм.

Бээжин, Москвагийн санаачилгаар НҮБ 2025 оны арванхоёрдугаар сард сансарт зэвсгийн уралдаанаас урьдчилан сэргийлэх, зэвсгийг анх байршуулахыг хориглох зорилготой гэх хоёр тогтоол баталжээ. Тагнуулын газрын тайланд эдгээрийг «шалгах боломжгүй олон улсын сансрын гэрээ, амлалт» гэж тодорхойлж, Хятад, Оросын тойрог замд гаргаж буй «аюултай эсвэл тодорхой бус зан үйлийг» зогсоогоогүй гэжээ.

АНУ-ын Батлан хамгаалахын тагнуулын газар «Сансрын аюулгүй байдалд тулгарч буй сорилтууд» тайлангаа 2019 оны эхээр анх гаргаж, 2022 онд шинэчилжээ. Энэ оных гурав дахь дугаар нь юм.

Энэ мэдээг бэлтгэхэд Америкийн дуу хоолойн хятад хэлний албаны Юй Вэнь Чэн оролцжээ.