АНУ-ын нисэх буудлуудын үйл ажиллагаа доголдлын дараа аажмаар сэргэж байна

АНУ-ын нисэх буудлуудын үйл ажиллагаа аажмаар сэргэж, нислэгүүд дахин хөөрч эхэллээ гэж АНУ-ын Тээврийн сайд Шон Даффи X сүлжээнд мэдэгдлээ.

“Өнөө өглөө нисэх буудлуудын ажил аажмаар хэвийн байдалдаа орж байна. Бид үйл ажиллагааг сэргээхэд дэмжлэг үзүүлэхээр агаарын тээврийн компаниудтай нягт хамтран ажиллаж байна. Одоо бидний нэн тэргүүний зорилт бол зорчигчдыг аль болох хурдан, аюулгүйгээр гэртээ, гэр бүлдээ эргэн очих боломжийг хангах явдал” гэж түүний бичлэгт дурджээ.

Нислэгүүд сэргэж, “аюулгүй нисэх” боломжтой болсныг Даффи нэмж хэлжээ. Тэрбээр мөн агаарын хөдөлгөөний удирдагч нар онгоцуудыг “хамгийн их хэрэгтэй газар” руу чиглүүлж, нислэгийн хуваарийг өөрчилж байгаа тул зорчигчид нислэгийн саатал, хойшлолттой тулгарна гэж анхааруулжээ.

Арваннэгдүгээр сарын 14-нд Axios сайт АНУ-ын Холбооны иргэний нисэхийн газар (FAA) “онцгой нөхцөл байдлын” улмаас тус улсын бүх нисэх буудлаас онгоц хөөрөхийг түр зогсоох шийдвэр гаргасан гэж мэдээлсэн байна. Хязгаарлалтыг агаарын хөдөлгөөний удирдлагын хэд хэдэн төвд нөлөөлсөн харилцаа холбооны доголдлоос болж тогтоосон байна.

Мөн өдөр хожим нь CNN телевиз АНУ-ын агаарын хөдөлгөөний удирдлагын системд гарсан техникийн доголдлоос болж 15000 нислэг саатсан эсвэл цуцлагдсан гэж мэдээлэв.