АНУ-ын Орегон мужид хоёр нисдэг тэрэг агаарт мөргөлдөж, гурван хүн амиа алджээ

АНУ-ын Орегон мужийн жижиг нисэх буудлын ойролцоо хоёр нисдэг тэрэг агаарт мөргөлдөж, гурван хүн амь насаа алдсаныг албаныхан мэдэгджээ. Энэ тухай Би Би Си мэдээлэв.

Робинсон болон Эйрбас үйлдвэрийн нисдэг тэрэгнүүд пүрэв гарагийн үдээс хойш Макминнвиллийн хотын нисэх буудлын ойролцоо мөргөлдсөн байна. Шерифийн газрын мэдээлснээр, хоёр нисдэг тэрэг хоёулаа хурдны замын хажуугийн талбайд унажээ.

Робинсон нисдэг тэргэнд Техасаас гаралтай 22 настай нисгэгч багш Мэдди Аасбо болон Их Британийн оюутан нисгэгч явж байжээ. Оюутны нэрийг төрөл төрөгсөдд нь мэдэгдэх ажил дуусах хүртэл консулын газар, Холбооны мөрдөх товчоотой хамтран нууцалж байна.

Эйрбас нисдэг тэрэгний цорын ганц зорчигч Орегон мужийн Ньюберг хотын 38 настай Тайлер Дилейн Стёрдевант амь үрэгджээ.

Ослын шалтгаан тодорхойгүй байна. Холбооны агаарын тээврийн газар болон Тээврийн аюулгүй байдлын үндэсний зөвлөл газар дээр нь ирж, мөрдөн шалгалтыг удирдаж байна.

Нисдэг тэрэгнүүдийн нэгийг Макминнвиллийн нисэх буудалд төвтэй Жерри Тримбл Хеликоптерс нисэхийн сургууль ажиллуулдаг байжээ.

“Манай нэг нисэх хэрэгсэл өнөөдөр үдээс хойш нисэхийн осолд орсныг маш харамсалтайгаар баталж байна” гэж тус компани мэдэгдээд, мөрдөн шалгагчидтай бүрэн хамтран ажиллаж байгаагаа нэмж хэлжээ.

Эрх баригчид хариу арга хэмжээ авч байх үед олон нийтийг тэр орчмоос зайлсхийхийг хүсчээ.