Австралийн тэтгэврийн настанг хөршийн тэжээвэр эму шувуу зовоож байна

Квинсланд мужийн Таунсвилл хотын захад амьдардаг тэтгэврийн настан Мал Ричардсыг Эрик хэмээх хөршийн тэжээвэр эму шувуу есөн сарын турш зовоож, гэрээсээ гарахаас айхад хүргэжээ гэж Эй Би Си Ньюс мэдээлжээ.

Ричардс өглөө бүр 6 цагаас өмнө сонингоо авахаар гарахад эм шувуу түүнийг хүлээж байдаг гэнэ. «Өдөржин зогсож дуугардаг» гэж Ричардс хэлжээ.

Тэрбээр хашаагаа түгжсэн ч Эрик заавал нэвтрэх арга олдог бөгөөд шувуу хүчтэй өшиглөдөг тул болгоомжлох хэрэгтэй гэжээ. Ричардс Таунсвилл хотын зөвлөл болон мужийн засгийн газрын байгууллагуудад хандсан ч бүгд хариуцлагаас зайлсхийсэн гэж гомдолложээ.

Байгаль орчны яамны хэвлэлийн төлөөлөгчийн хэлснээр, байгаль хамгаалагчид Блюуотерт эму шувууг ажиглаж байгаа ч шувуу эмзэглэл төрүүлэх үйлдэл гаргаагүй байна. Оршин суугчдыг шувуунаас хол байж, хооллохгүй байхыг уриалжээ.

Блюуотер хорооллын фэйсбүүк хуудсанд Эрикийг хорооллын сахиус гэж бичсэн нийтлэл олон байгаа бол нэгэн оршин суугч автобусны буудал дээр сурагчид Эрикээс зугтаж хашаа давахад хүрснийг бичжээ.

Зэрлэг амьтны сурган хүмүүжүүлэгч Жеки Хаслингийн хэлснээр, Эрикийг тэжээвэр амьтан болгон өсгөсөн тул зэрлэг эмугаас илүү найрсаг байх магадлалтай. Хотын зөвлөлийн мэдэгдлээр, 2000 ам метрээс том талбайд тохирох хашаатай бол эму тэжээхийг орон нутгийн хууль хориглодоггүй.

Хаслинг эму заналхийлсэн зан авир гаргавал аажмаар ухарч, мод зэрэг саадыг хооронд нь байлгахыг зөвлөжээ. Хэн ч арга хэмжээ аваагүй тул Ричардсыг хөршийн тэжээвэр эму шувуу дагасаар байна.