Австралийн засгийн газар төсвийн тодотголд нийт хэмнэлт гаргахаа амлахаас татгалзжээ
Инфляци өндөр хэвээр байгаа тул Нөөцийн банк бодлогын хүүг дахин өсгөх төлөвтэй байна.
Австралийн Сангийн сайд Кэти Галлахер холбооны төсөвт үзүүлэх дарамт нэмэгдэж байгаа тул засгийн газар арванхоёрдугаар сарын төсвийн тодотголд нийт хэмнэлт гаргана гэж амлах боломжгүй гэж мэдэгдсэн тухай Австралийн «Эй Би Си» телевиз мэдээлжээ.
Сангийн яамны сайд Жим Чалмерс ч мөн есдүгээр сар хүртэлх жилийн инфляци хүлээгдэж байснаас өндөр буюу 4.3 хувьд хүрсний дараа жилийн дундах төсвийн тодотголд цэвэр хэмнэлт гаргахаа амлахаас лхагва гарагт татгалзсан байна. Энэ үзүүлэлт Нөөцийн банк мягмар гарагт хуралдахдаа хүүгээ дахин өсгөнө гэх хүлээлтийг нэмэгдүүлжээ.
«Бид хэмнэлтийн чиглэлээр их ажил хийж байгаа ч хараахан гараагүй шийдвэрийг урьдчилан хэлж чадахгүй» гэж Галлахер хэлэв.
Сайд өмнөх бүх төсөв, тодотголд засгийн газар төсвийн ерөнхий байдлыг сайжруулж ирсэн гэдгийг онцолж, эрүүл мэнд, ахмадын асаргааны салбарт дарамт өсөж байгааг дурджээ.
Нөөцийн банкны ерөнхий эдийн засагч Сара Хантер өнгөрсөн долоо хоногт муж болон холбооны засгийн газрын зардал эдийн засаг дахь эрэлтийн дарамтад «гарцаагүй» нөлөөлж байгааг хэлсэн бол засгийн газар Иран дахь дайныг инфляцийн гол хүчин зүйл гэж үздэг.
Сөрөг хүчний удирдагч Ангус Тейлор засгийн газар хүүгийн цаашдын өсөлтөөс сэргийлэхийн тулд илүү ихийг хийж чадна гэж мэдэгджээ.
Ерөнхий сайд Энтони Албаниз Нөөцийн банк инфляцитай тэмцэхэд ганцхан мохоо хэрэгсэлтэй гэдгийг хүлээн зөвшөөрсөн. Эдийн засаг дахь эрэлтийг бууруулах бусад хөшүүрэг холбооны болон мужийн засгийн газрын гарт байгаа юм.
