Байден хорт хавдартайгаа мэдсэн бол огцрох байсан гэжээ

АНУ-ын Ерөнхийлөгч асан Жо Байден Цагаан ордонд байхдаа хорт хавдартайгаа мэдээгүй, хэрэв мэдсэн бол албан тушаалаасаа буух байсан гэж саяхан өгсөн ярилцлагадаа хэлснийг Тайм сэтгүүл мэдээлжээ.

2024 оны сонгуулийн үеэр ямар нэг зүйлийг өөрөөр хийх байсан уу гэж Пипл сэтгүүл асуухад 83 настай Байден “Хэрэв би хорт хавдраас болж бие муу байгаагаа мэдсэн бол огцрох байсан. Хорт хавдартай 80 настай хүн нэр дэвших ёсгүй гэж би боддог” гэж хариулжээ.

Байдены алба 2025 оны 5 дугаар сард түүнд түрэмгий хэлбэрийн түрүү булчирхайн хорт хавдар оношлогдож, яс руу нь тархсаныг зарласан юм. Дараа нь тэрбээр мэс засалд орж, туяа эмчилгээ хийлгэсэн байна.

Албан тушаал хашиж байхдаа оношоо нуусан гэх буруутгалын талаар асуухад Байден үүнийг үгүйсгэж, мэдсэн даруйдаа олон нийтэд мэдэгдсэн гэжээ.

Эрүүл мэндийн байдлаас болж 11 дүгээр сарын 17-нд гарах шинэ дурсамж номоо сурталчлах олон нийтийн арга хэмжээнд хүссэн хэмжээгээрээ оролцож чадахгүй гэдгээ Байден Ням гарагт мэдэгдсэн байна.

“Би мөнхөд амьдарна гэж хэлэхгүй байна. Гэхдээ гол нь би бүх чадвараа хадгалж, өмнө нь байсан бүх зүйлдээ хандах боломжтой бөгөөд биеэ сайн мэдэрч байна” гэж тэрбээр хэлжээ.

Байден 2024 оны 6 дугаар сард Трамптай хийсэн мэтгэлцээнээс хэдэн долоо хоногийн дараа дахин сонгогдох кампанит ажлаа зогсоож, Дэд ерөнхийлөгч Камала Харрисыг дэмжсэн юм. Сонгуулийн дараа явуулсан нэгэн судалгаанд оролцогчдын 59 хувь нь Байдены нас, оюун ухааны байдал сонгуулийн үр дүнд маш чухал нөлөө үзүүлсэн гэж үзжээ.