Мегаспид компанийн хоосон оффисууд Нвидиа, Хятадтай холбоотой эсэх асуултыг улам олшруулжээ

Нвидиа компанийг хамарсан Хятадын тагнуулын дуулианы гол төвд байгаа Мегаспид Интернэшнл компанийн дэлхийн хэмжээний ер бусын сүлжээ уг компани Хятадын засгийн газрын халхавч байж болох эсэх асуултыг өдөөж байгааг Си Би Эс Ньюс мэдээлжээ. Тус компани Сингапурт төвтэй.

Компанийн удирдагчдын нэг нь Элис Хуан юм. Тэрбээр Нвидиагийн гүйцэтгэх захирал Жэнсэн Хуантай дотно харилцаатай байсан бөгөөд АНУ-ын тагнуулынхан түүнийг Хятадын Төрийн аюулгүй байдлын яамны агент гэж сэжиглэж байна. Нью-Йорк Таймс сонины анх мэдээлснээр, Мегаспид сүүлийн гурван жилд бараг 5 тэрбум ам.долларын хиймэл оюун ухааны чип, тоног төхөөрөмж худалдан авчээ.

Гэвч Стрейтс Таймс сонины мэдээлснээр, компанийн Сингапур дахь төв оффис бараг хоосон байжээ. Сүүлийн өдрүүдэд гарсан мэдээллүүдээс үзэхэд, Австрали дахь охин компанийнх нь захирлаар сонины худалдагчийг бүртгэсэн бөгөөд Малайз дахь нэг оффис нь Куала Лумпурын ойролцоох хуучирсан дэлгүүр байжээ.

АНУ-ын мөрдөн байцаагчдын хэлснээр, Элис Хуан салбарын холбоо харилцаа, хэд хэдэн хуурмаг компаниар дамжуулан Хятад руу экспортлохыг хориглосон 240 мянган чип олж авсан байна. Эдгээр чипийг Хятад руу хууль бусаар нэвтрүүлсэн гэх хэргээр компанийг АНУ, Сингапурт шалгаж байна.

Холбооны мөрдөх товчоо Жэнсэн Хуан, Элис Хуан хоёрын хайр дурлалын болон бизнесийн харилцааг шалгаж байгааг Ерөнхийлөгч Трамп энэ долоо хоногт хэлжээ. Гэр бүлтэй Жэнсэн Хуан ажилтнууддаа хандан харилцааныхаа төлөө уучлалт гуйжээ. Нвидиагийн удирдах зөвлөл компанийн нууц, үндэсний аюулгүй байдал алдагдсан гэж үзэх шалтгаан байхгүй гэж мэдэгджээ.

Мегаспид өөрийн вэбсайтад “төөрөгдүүлсэн мэдээлэл”-ийг няцаасан мэдэгдэл нийтэлж, сүүлийн зургаан сард АНУ-ын Худалдааны яамны Аж үйлдвэр, аюулгүй байдлын товчоо, Малайзын холбогдох яам болон Нвидиагийн хийсэн шалгалтаар хууль бус үйлдлийн нотлох баримт илрээгүй гэжээ.

Компанийн бүртгэлийн баримтаас үзэхэд, Британийн Виржиний арлуудад бүртгэлтэй Элис Хуаны хятад нэрээр нэрлэгдсэн Хуан Лэ Лимитед хэмээх компани 2023 оны 3 дугаар сард Хятадын тоглоомын компанийн охин компанийг худалдан авч, нэрийг нь Мегаспид Интернэшнл болгон өөрчилжээ. Элис Хуан тус компанийн гүйцэтгэх захирал болсон байна. Элис Хуан 2023 оны 10 дугаар сарын эцэс гэхэд компаниас гарсан хэдий ч тус компанитай одоо ч холбоотой хэвээр байж болзошгүй шинж бий.