Бангладеш оёдлын ажилчдын жагсаалын дунд цалингийн зөвлөл байгуулжээ
Ажилчид сарын доод цалинг одоогийнхоос хоёр дахин илүү нэмэгдүүлэхийг шаардаж байна.
Бангладеш улс аж үйлдвэрийн гол төвүүдийн үйл ажиллагааг тасалдуулсан жагсаалыг намжаахын тулд оёдлын ажилчдын доод цалинг хянах шинэ цалингийн зөвлөл байгуулсан гэж Аль Жазира телевиз мэдээлжээ.
Ням гарагт зарласан ч цалингаа нэмүүлэхийг шаардсан олон мянган ажилчин нийслэл Дакка орчимд жагсаалаа үргэлжлүүлж, цагдаа нулимс асгаруулагч хий, дуут гранат хэрэглэжээ.
Ажилчид сарын доод цалинг одоогийн 12,500 таагаас (101 ам.доллар) 30,000 таага (242 ам.доллар) болгохыг шаардаж байгаа бөгөөд хүнс, орон сууц, тээвэр, эрүүл мэндийн зардал өссөн нь худалдан авах чадварыг нь эрс бууруулсан гэж үзэж байна.
Засгийн газар, ажилчид, үйлдвэр эзэмшигчдийн төлөөлөл бүхий зургаан гишүүнтэй зөвлөл шинэ доод цалинг тогтоох үүрэгтэй юм.
Жагсаал бямба гарагт эхэлж, Даккагийн захын 30 орчим оёдлын үйлдвэр амралт зарлахад хүргэсэн байна.
Бангладешийн оёдлын салбар Хятадын дараа дэлхийд хоёрдугаарт ордог бөгөөд дотоодын нийт бүтээгдэхүүний 10 орчим хувийг бүрдүүлдэг. Үйлдвэрлэгчид үйлдвэрлэлийн зардал өсөх, хий, цахилгааны тасалдал зэрэг бэрхшээлтэй тулгарч байна.
