Барселона Алавесийг 6-1-ээр бут ниргэж Ла Лигийн тэргүүлэх байраа эргүүлэн авчээ
Барселона Атлетико Мадридаас хоёр онооны зөрүүтэй тэргүүлж, ирэх ням гарагт түүнтэй тэргүүн байрын төлөө тоглоно.
Барселона баг бямба гарагт Кам Ноу цэнгэлдэх хүрээлэнд Алавес багийг 6-1-ээр бут ниргэж, Испанийн Ла Лигийн тэргүүлэх байраа эргүүлэн авсан бөгөөд Рафинья, Ламин Ямаль нар тус бүр хоёр гоол оруулсан гэж Аль Жазира телевиз мэдээлжээ.
Хансы Фликийн шавь нар өнгөрсөн долоо хоногт Аваргуудын лигт Пари Сен-Жерменд, Эль Класико тоглолтод Реал Мадридад ялагдсаны дараа хэлбэрээ олжээ.
Рафинья эхний хагаст хоёр гоол оруулж, Фермин Лопес мөн гоол хийсэн бол Ямаль завсарлагааны өмнө болон хоёрдугаар хагасын дундуур гоол оруулав. Сэлгээний тоглогч Энтони Гордон зургаа дахь гоолыг оруулсны дараа Мариано Диас Алавесийн цорын ганц гоолыг хийжээ.
Үүнээс өмнө хоёрдугаар байрт яваа Атлетико Мадрид Леванте багийг 2-0-ээр хожиж, дараалсан долоо дахь ялалтаа байгуулсан бөгөөд дасгалжуулагч Диего Симеоне Атлетикогийн удирдагчаар Ла Лигт 344 дэх ялалтаа байгуулж, клубийн дээд амжилттай тэнцжээ.
Тоглолт бүрийн өмнө лхагва гарагт Толедо мужид болсон галт тэрэгний осолд амиа алдсан 69 хүний дурсгалд нэг минут чимээгүй зогссон байна.
Барселона мягмар гарагт Аваргуудын лигт Астон Вилла багийг хүлээн авч, ирэх ням гарагт Ла Лигийн тэргүүн байрын төлөөх тоглолтод Атлетико Мадридтай тоглох юм.
