Бронкст буудуулж амиа алдсан хүүгийн ээжид Трамп виз олгоно гэж Мамдани мэдэгдэв
Трампын засаг захиргааны үед Африкийн хэд хэдэн орны иргэдэд виз олгохыг ихээхэн хязгаарласан байна.
Нью-Йорк хотын дарга Зохран Мамдани АНУ-ын Ерөнхийлөгч Дональд Трамптай утсаар ярьсны дараа Бронкс дүүрэгт буудуулж амиа алдсан Ганын 15 настай хүүгийн ээжид виз олгох болсныг мэдэгдсэн гэж Аль Жазира телевиз мэдээлжээ.
Мамдани бямба гарагт нийгмийн сүлжээнд нийтэлсэн бичлэгтээ хүүгийнхээ сүүлчийн замд үдэхээр Нью-Йорк руу ирэхийг хүсч буй Жавитс Фримпонгийн ээжид Трамп нэн даруй виз олгохыг зөвшөөрсөн гэж бичжээ. Трамп энэ талаар тайлбар хийгээгүй байна.
Хяналтын камерын бичлэгт Фримпонг пүрэв гарагийн өглөө сургууль руугаа явж байхдаа өөр гурван өсвөр насны хүүхдэд хөөгдөж байгаа нь харагджээ. Тэрбээр гэдсэндээ буудуулж, тэр өдөртөө эмнэлэгт нас барсан байна. Цагдаа мөрдөн шалгаж байгаа ч одоогоор хэнийг ч баривчлаагүй.
Хүүгийн эцэг эх түүнийг илүү сайн амьдралтай болгох найдлагаар жилийн өмнө АНУ руу авчирсан бөгөөд хотын өнцөг булан бүрт болсон эмгэнэлийн арга хэмжээнд олон мянган хүн оролцжээ.
Ганын Гадаад хэргийн сайд Сэм Окудзето Аблаква Ганын албан тушаалтнууд орон нутгийн эрх баригчидтай хамтран ажиллаж, хүүгийн ээжийн визийн хүсэлтэд тусалж байгааг мэдэгдсэн юм.
