Барууны орнууд иргэний дайн үргэлжилж буй Суданд өлсгөлөн нүүрлэх эрсдэлтэйг анхааруулав

АНУ болон барууны өөр 30 улс Суданы хүнсний аюулгүй байдал аймшигтай доройтож байгааг анхааруулж, иргэний дайнд оролцогч талуудыг өлсгөлөнгөөс сэргийлэхийн тулд хүмүүнлэгийн тусламжийн саад тотгорыг арилгахыг уриалжээ. Энэ тухай Би Би Си мэдээлэв. Хамтарсан мэдэгдэлд гарын үсэг зурагчид мөргөлдөөн чухал дэд бүтцийг сүйтгэж, хүнсний үйлдвэрлэлийг тасалдуулж буй нь Суданы өлсгөлөнгийн хямралын гол шалтгаан гэж үзжээ.

Мэдэгдэлд Европын холбооны орнууд, Их Британи, Канад, Швейцарь, Норвеги, АНУ гарын үсэг зурсан бөгөөд Европын иргэний хамгаалал, хүмүүнлэгийн тусламжийн ажиллагааны сайтад анх гарсны дараа даваа гарагт АНУ-ын Төрийн департамент нийтэлжээ. Мэдэгдлийн тооцоогоор Суданы хүн амын 41 хувь буюу 19.5 сая хүн хүнсний хурц хомсдолд өртөж байгаа бөгөөд тэдний таван сая нь онц байдлын түвшний өлсгөлөнтэй тулгараад байна.

2023 оны 4 дүгээр сард Суданы Зэвсэгт хүчин, хагас цэрэгжсэн Шуурхай дэмжлэгийн хүчний эрх мэдлийн тэмцлээс үүдэн эхэлсэн дайны улмаас 14 сая хүн орон гэрээсээ дүрвэжээ. Исламын тусламж байгууллагын Зүүн Африк дахь бүсийн захирал Юсуф Робле Омдурманд буцаж ирж буй хүмүүс байшингаа сүйрсэн эсвэл дээрэмдүүлсэн байхыг олж харж байгаа бөгөөд амьд үлдэхэд хэрэгтэй зүйл маш бага байна гэж Би Би Си-д ярьжээ.

Дэлхийн эрүүл мэндийн байгууллага Суданы дайныг дэлхийн хамгийн хүнд хүмүүнлэгийн хямрал гэж тодорхойлсон ч 9 дүгээр сарын байдлаар Суданы 2026 оны хүмүүнлэгийн хэрэгцээний төлөвлөгөөний ердөө 40 хувь л санхүүжсэн гэж Робле хэлэв. Түүний хэлснээр, хүмүүс санхүүжилт танагдсанаас урт хугацааны дэмжлэггүй олон нийтийн гал тогооноос хооллож байна. Тэрбээр нөхөр нь гурван жил хагасын турш сураггүй болсон, гэр бүлийнхээ цорын ганц тэжээгчээ алдсан долоон хүүхэдтэй эхтэй уулзсанаа ярьжээ.

Хамтарсан мэдэгдэлд нэн даруй арга хэмжээ авахгүй бол хүнд хэлбэрийн хурц хоол тэжээлийн дутагдалтай хүүхдийн тоо төсөөлж буй 825,000-аас давж болзошгүйг анхааруулсан. Гарын үсэг зурагчдын хэлснээр, тусламжийг системтэйгээр саатуулж байгаа явдал болон Суданы тэн хагасаас илүү нутагт хур тунадасыг багасгаж, ган гачгийг нэмэгдүүлсэн Эль-Ниньогийн нөлөө хямралыг улам хүндрүүлж байна.

«Мөргөлдөөний талууд Суданы ард түмний зовлонг хөнгөвчлөх үндсэн хариуцлагыг хүлээнэ» гэж мэдэгдэлд дурдаж, хүмүүнлэгийн тусламжид тавьсан бүх саадыг арилгаж, бүрэн, аюулгүй, түргэн, саадгүй нэвтрэх боломж олгохыг уриалжээ. НҮБ-ын дэмжлэгтэй Хүнсний аюулгүй байдлын үе шатны нэгдсэн ангилал 6 дугаар сард Суданд 5.1 сая хүн хүнд өлсгөлөнтэй тулгарч байна гэж тооцоолсон юм.