Катар Ираныг бүс нутгийн орнуудад заналхийлэхээ зогсоож, Ормузын хоолойг нээж сайн санаагаа харуулахыг уриалав

Катар мягмар гарагт Ираныг бүс нутгийн орнуудад заналхийлэхээ зогсоож, Ормузын хоолойг дахин нээж сайн санаагаа харуулахыг уриалжээ. Энэ тухай Евроньюс телевиз мэдээлэв. «Бид энэ асуудлаар Ираны талаас эерэг мэдэгдэл сонссон ч тэд сайн санаагаа харуулах хэрэгтэй хэвээр байна» гэж Катарын Гадаад хэргийн яамны Хэвлэл мэдээлэл, харилцааны газрын дарга Ибрахим бин Султан Аль Хашми Дохад болсон долоо хоног тутмын хэвлэлийн бага хурал дээр хэлэв.

Аль Хашмигийн хэлснээр, Катарын төлөөлөгчдийн Тегеранд хийсэн саяхны айлчлал нь Пакистан болон бүс нутгийн бусад түншүүдтэй хамтран явуулж буй зуучлалын ажлын нэг хэсэг юм. Төлөөлөгчид шинэ санал авч очсон эсэхийг асуухад тэрбээр хоёр талтай мессеж, санаа солилцсоор байгааг хэлсэн ч саналын нарийн зүйлийг дэлгээгүй, нээлт гарсныг зарлаагүй. Түүний хэлснээр, Вашингтон, Тегеран хоёулаа хурцдал болон дипломат шийдлийн боломжийн талаар ярьж байгаа бөгөөд зуучлагч энэ найдварын цонхыг үргэлж барьж байдаг.

Даваа гарагт Саудын Арабын Батлан хамгаалахын сайд хунтайж Халид бин Салман, Пакистаны армийн командлагч Асим Мунир, Туркийн тагнуулын тэргүүн Ибрахим Калын нар Тегеранд Ираны удирдагчидтай уулзсан. Гурван улс 8 дугаар сард Меккийн харилцан батлан хамгаалах гэрээнд гарын үсэг зурсан бөгөөд Ираны төрийн хэвлэлийн мэдээлснээр, дөрвөн улс энх тайван, аюулгүй байдлын асуудлаар яриа хэлэлцээгээ үргэлжлүүлэхээр тохиролцжээ. Аль Хашмигийн хэлснээр, Катар болон Персийн булангийн хөршүүд нь бүрэн эрхт байдлыг хүндэтгэх, бие биендээ халдахгүй байх амлалтад суурилсан бүс нутгийн аюулгүй байдлын тогтолцоонд оролцоход бэлэн байна.

Хэлэлцээ Ираны дэмжлэгтэй Йемений хуситууд Саудын Араб руу халдсаар байгаа энэ үед өрнөж байгаа бөгөөд Египетийн парламент даваа гарагт хаант улсыг хамгаалахад цэргийн дэмжлэг үзүүлэхийг зөвшөөрсөн юм. АНУ, Иран хэлэлцээрийн нөхцөлөөр санал зөрөлдсөөр байна. Тегеран боомтуудынхаа АНУ-ын бүслэлтийг цуцалж, газрын тосны экспортын хоригийг арилгахыг хүсч байгаа бол Вашингтон Иранаас цөмийн баяжуулалтаа бууруулахыг шаардаж байна.

Дайн 2 дугаар сарын сүүлээр АНУ, Израиль Иран руу цохилт өгснөөр эхэлсэн. Ираны тээвэрт тавьсан хязгаарлалт, АНУ-ын бүслэлт Персийн булангийн газрын тос, байгалийн хийн экспортын гол зам болох Ормузын хоолойн хөдөлгөөнийг ноцтой тасалдуулжээ. Өнгөрсөн долоо хоногт Иран хоолойн ойролцоо танкерууд руу халдсаны дараа Брент маркийн газрын тосны үнэ нэг баррель нь 117 ам.доллар (105 евро)-оос давж, 4 дүгээр сараас хойших хамгийн өндөр түвшинд хүрсэн бөгөөд Ормузаар дамжих газрын тосны урсгал хэвийн хэмжээний 60 орчим хувьтай байна.