Батлан хамгаалах яам: Цэргийн академийн төлөвлөгөөг олон нийтэд илүү хүлээн зөвшөөрөгдөхүйц болгохоор өөрчилж байна

Хуурай замын, Агаарын, Тэнгисийн цэргийн академийг нэг байгууллага болгон нэгтгэх анхны төлөвлөгөөг бодлогыг олон нийтэд илүү хүлээн зөвшөөрүүлж, “бүрэн бүтэн байдлыг” нь нэмэгдүүлэх ажлын хүрээнд өөрчилж байна гэж Өмнөд Солонгосын Батлан хамгаалах яам Пүрэв гарагт мэдэгджээ.

Яам саяхан Үндэсний ассемблейд шинэчилсэн төлөвлөгөөгөө танилцуулсан байна. Үүний дагуу улсын төв хэсэгт орших Тэжон хотод хамтарсан цэргийн академи байгуулна. Тэнгисийн цэргийн академи өмнөд хэсгийн Жинхэ дүүрэгт, Агаарын цэргийн академи төв хэсгийн Чонжу хотод хэвээр үлдэж, Хуурай замын цэргийн академийг төв хэсгийн Чүнчон бүс рүү нүүлгэнэ.

Яам анх цэргийн төрөл хоорондын хамтын ажиллагааг бэхжүүлж, курсантын сургалтын үр ашгийг дээшлүүлэхийн тулд гурван академийг нэгтгэхээр төлөвлөсөн ч академийн төгсөгчид, сөрөг хүчний гишүүд, Жинхэ, Чонжугийн оршин суугчид үүнийг эсэргүүцэж байсан юм.

“(Өөрчлөлт нь) бодлогыг олон нийтэд хүлээн зөвшөөрүүлж, бүрэн бүтэн байдлыг нь нэмэгдүүлэх ажлын нэг хэсэг юм” гэж яамны хэвлэлийн төлөөлөгч Чон Бин На хэвлэлийн бага хурлын үеэр хэлэв.

“Шинэчилсэн төлөвлөгөө эцэслэгдсэний дараа бид тайлбарлана. Цаашид (хамтарсан академи байгуулах) хууль, түүний хэрэгжүүлэх журмыг боловсруулах явцад янз бүрийн санал бодлыг цуглуулах шаардлагатай. Тиймээс санал цуглуулах ажил үргэлжилнэ” гэж тэрбээр нэмжээ.

Хэвлэлийн төлөөлөгч Чон Бин На “олон нийтийн хүлээн зөвшөөрөлт” гэж дурдсан нь эсэргүүцэгчдийн санал бодлыг илүү тусгаж төлөвлөгөөнд засвар хийхэд яам бэлэн байгааг илэрхийлсэн бололтой.

Гэвч өөрчлөлт нь “ухралт ч биш, буулт ч биш” гэж Батлан хамгаалахын сайд Кан Шин Чол өмнөх өдөр парламентад хэлсэн байна.

Шинэчилсэн төлөвлөгөөний зардлыг анх 2.7 их наяд вон гэж тооцож байсан бол одоо 1.5 их наяд вон орчим болгон бууруулснаа яам Үндэсний ассемблейд танилцуулсан гэнэ. Бодит төсвийг урьдчилсан судалгааны дараа тогтооно гэж хэвлэлийн төлөөлөгч хэлжээ.

“Бид ирээдүй хойч үедээ хөрөнгө оруулах боломжийг хангахын зэрэгцээ зардлыг аль болох бууруулж, хамгийн бага байлгахаар шинэчилсэн төлөвлөгөөг боловсруулж байна” гэж тэрбээр хэлэв.