Ерөнхийлөгч Ли Жэ Мёны хувийн мэдээлэл алдагдсан асуудлыг Өмнөд Солонгос, Бельги хоёр хэлэлцжээ

Ерөнхийлөгч Ли Жэ Мён зургаадугаар сард Бельги зэрэг Европын орнуудад айлчлах үеэр өөрийнх нь болон дагалдан явсан хүмүүсийн хувийн мэдээлэл алдагдсан асуудлыг Өмнөд Солонгос, Бельги хоёр хэлэлцэж, харилцаа холбоогоо нягт байлгахаар тохиролцсоныг Сөүлийн Гадаад хэргийн яам Пүрэв гарагт мэдэгджээ.

Гадаад хэргийн нэгдүгээр дэд сайд Пак Юн Жү өнгөрсөн Баасан гарагт Сөүлд Бельгийн Гадаад хэргийн яамны ерөнхий нарийн бичгийн дарга Теодора Гентзистэй уулзахдаа энэ асуудлыг хэлэлцсэн байна.

“Уулзалтын үеэр янз бүрийн салбарт хамтын ажиллагааг дэмжих арга замыг хэлэлцэж, мэдээлэл алдагдсан асуудлыг ч ярилцсан. Бид энэ асуудалд нухацтай хандаж, шалгаж байна. Хоёр тал нягт харилцаагаа үргэлжлүүлэхээр тохиролцсон” гэж яамны хэвлэлийн төлөөлөгч Пак Ду Сун хэлэв.

Ли Жэ Мён, тэргүүн хатагтай Ким Хе Гён зэрэг Ерөнхийлөгчийн онгоцонд явсан 168 хүний хувийн мэдээлэл бүхий файл хортой программ шалгадаг VirusTotal цахим хуудсанд байршуулагдсан байсан нь илэрснээр энэ явдал ил болжээ.

Нэр, харьяалал, албан тушаал, төрсөн огноо, паспортын мэдээлэл агуулсан уг файлыг Ли Жэ Мён Бельги, Франц, Италид айлчлахаас долоо хоног орчмын өмнө буюу зургаадугаар сарын 2-нд байршуулсан бөгөөд файл таван сар орчим нээлттэй байжээ.

Мэдээлэл хакерын халдлагаар бус, айлчлалтай холбоотой баримт бичгийг боловсруулах явцад алдагдсан гэж үзэж байгаагаа албаныхан мэдэгдсэн байна.

Мэдээлэл Бельги дэх Өмнөд Солонгосын Элчин сайдын яам, Бельгийн эрх баригчдын хооронд баримт бичиг солилцох явцад алдагдсан эсэх зэрэг янз бүрийн хувилбарыг Сөүлийн эрх баригчид шалгаж байгаа аж.