Ли Жэ Мён: Өмнөд Солонгосын хөрөнгийн зах зээл дутуу үнэлэгдсэн хэвээр байна

Өмнөд Солонгосын хөрөнгийн зах зээл дутуу үнэлэгдсэн хэвээр байна гэж Пүрэв гарагт Ерөнхийлөгч Ли Жэ Мён хэлээд, зах зээлийн дэлхийн өрсөлдөх чадварыг нэмэгдүүлэх, урт хугацааны хөрөнгө оруулалт татах арга хэмжээ авахыг уриалжээ.

Ерөнхийлөгч Сөүл дэх Чонвадэд гол туслахуудтайгаа хийсэн уулзалтын үеэр ингэж хэлсэн юм. Тус улсын хөрөнгийн зах зээл сүүлийн саруудад их хэлбэлзэлтэй байгаа үед ийм мэдэгдэл гарлаа.

Солонгосын хувьцааны нийлмэл индекс (KOSPI) зургаадугаар сарын сүүлээр 9114.55 пунктэд хаагдаж түүхэн дээд түвшинд хүрч байсан. Харин Пүрэв гарагт 5342.73 пунктэд хаагдсан нь олон хөрөнгө оруулагчийг түгшээжээ.

Ерөнхийлөгчийн хэлснээр, сүүлийн үеийн гадаад орчны тодорхойгүй байдал тус улсын хөрөнгийн зах зээлд ихээхэн нөлөөлсөн байна.

Эдийн засгийн суурь үзүүлэлт, компаниудын өрсөлдөх чадварыг харгалзвал Солонгосын хөрөнгийн зах зээл “дутуу үнэлэгдсэн хэвээр байгаа, хөрөнгө оруулахад сонирхол татахуйц газар” гэж Ли Жэ Мён уулзалтын үеэр хэлэв.

Засгийн газар хөрөнгийн зах зээлийг шударгаар үнэлүүлэх, мөн зах зээлийн эрүүл хөгжил нь өрхийн баялгийг өсгөж, иргэдийн амьжиргааг сайжруулах орчныг бүрдүүлэхэд хүчин чармайлтаа чиглүүлэх ёстой гэж тэрбээр хэлжээ.

Ерөнхийлөгч тус улсын хөрөнгийн зах зээлийг дэлхийд өрсөлдөх чадвартай, хөгжингүй зах зээл болгох ажлыг эрчимжүүлэхийг гол туслахууддаа даалгав. Тэрбээр компанийн үнэлгээ, хувьцаа эзэмшигчдийн өгөөжийг сайжруулж, урт хугацааны хөрөнгө оруулалт татах арга хэмжээ авахыг тусгайлан онцолсон байна.

“Хөрөнгийн зах зээл компанийн инноваци, хөрөнгө оруулалтыг дэмжиж эдийн засгийн хөгжлийг тэргүүлбэл эдийн засаг илүү том үсрэлт хийх боломжтой бөгөөд энэ нь эргээд хөрөнгийн зах зээлийг бэхжүүлэхэд тусална” гэж Ерөнхийлөгч тэмдэглэв.