Өмнөд Солонгосын KEPCO-гийн гуравдугаар улирлын цэвэр ашиг 78 хувиар буурчээ

Солонгосын цахилгаан эрчим хүчний корпорацийн (KEPCO) гуравдугаар улирлын цэвэр ашиг түлшний зардал өссөний улмаас өмнөх оны мөн үеэс 78 хувиар буурсныг төрийн өмчит тус компани Пүрэв гарагт мэдэгджээ.

Долоо-есдүгээр сарын цэвэр ашиг өнгөрсөн оны мөн үеийн 3.79 их наяд воноос 835.89 тэрбум вон болж буурсныг компани хэвлэлийн мэдээндээ дурджээ.

“Гуравдугаар улиралд цахилгааны борлуулалт буурч, дэлхийн эрчим хүчний нүүрсний үнэ өссөөр байсан нь бусад хүчин зүйлийн хамт манай ашигт сөргөөр нөлөөлсөн” гэж компанийн хэвлэлийн төлөөлөгч хэлэв.

Гуравдугаар улиралд Korea South-East Power зэрэг эрчим хүч үйлдвэрлэдэг охин компаниудын түлшний нийт зардал 2.2 их наяд воноос давсан нь ашигт дарамт болсон байна.

Үйл ажиллагааны ашиг 5.65 их наяд воноос 70.9 хувиар буурч 1.64 их наяд вон болсон бол борлуулалтын орлого 27.57 их наяд воноос 2.6 хувиар буурч 26.85 их наяд вон болжээ.

KEPCO эрчим хүчний үнийн хэлбэлзлийг анхааралтай ажиглахын зэрэгцээ зардал бууруулах, ашигт ажиллагаагаа дээшлүүлэх замаар санхүүгийн байдлаа сайжруулахад чиглэсэн онцгой удирдлагын тогтолцоогоо хэвээр хадгална гэжээ.

Орос 2022 оны хоёрдугаар сарын 24-нд Украин руу довтолсноос хойш түлшний үнэ өсөж, өр, хүүгийн зардал нэмэгдсэн тул компани онцгой удирдлагын горимд ажиллаж байгаа юм.

Оны эхний есөн сарын цэвэр ашиг өмнөх оны мөн үеийн 7.33 их наяд воноос 50.4 хувиар буурч 3.63 их наяд вон болжээ. Үйл ажиллагааны ашиг өмнөх оноос 43.2 хувиар буурч 6.56 их наяд вон, борлуулалт 0.8 хувиар буурч 73.17 их наяд вон болсон байна.