Бельги, Чили хоёр далайн гэрээний нарийн бичгийн газрыг байршуулахаар хамтран нэр дэвшснийг Хятад шүүмжиллээ

Бельги, Чили хоёр Үндэсний харьяаллаас гадуурх далайн биологийн олон янз байдлын тухай (BBNJ) гэрээний нарийн бичгийн газрыг байршуулахаар хамтран санал гаргасныг Хятадын Гадаад хэргийн яамны хэвлэлийн төлөөлөгч Мао Нин Пүрэв гарагт шүүмжилжээ.

Бельги, Чили хоёр нэр дэвшүүлэлтээ нэгтгэснээ арваннэгдүгээр сарын 6-нд зарласан байна. Энэ саналаар нарийн бичгийн газар Чилийн Вальпараисо хотод, мэдээлэл солилцох механизм (CHM) Брюссельд байрлаж, туслах байгууллагуудын хурал мөн Брюссельд болно.

Хятад энэ оны эхээр Сямэнь хотыг нарийн бичгийн газрын байршилд нэр дэвшүүлжээ. Гэрээний талуудын дийлэнх нь үүнийг удалгүй дэмжсэн гэж Мао Нин хэллээ.

“Талуудын бага хурлаар шийдвэрлэх ёстой асуудлаар зөвшөөрөлгүй, хөшигний цаадах тохироо хийхийг оролдсон энэ хамтарсан нэр дэвшүүлэлт дор хаяж зургаан талаар асуудалтай байна” гэж тэрбээр хэлжээ.

Гэрээ ёсоор нарийн бичгийн газрын байршил, механизмын ажиллах журам, туслах байгууллагуудын хурлын газрыг талуудын бага хурал тогтоох ёстой гэж хэвлэлийн төлөөлөгч тайлбарлажээ. Механизмыг нарийн бичгийн газар удирдана.

“Бельги, Чили хоёр гэрээний бүх талын хамтран шийдэх ёстой асуудлыг ширээн доогуур наймаалцжээ. Энэ нь гэрээний заалтыг зөрчсөн, талуудын бага хурлын эрх мэдлийг үл хүндэтгэсэн үйлдэл” гэж Мао Нин мэдэгдэв.

Нарийн бичгийн газрын байршил, механизмын асуудлыг тус тусад нь шийдвэрлэх ёстой атал хоёр улс тэдгээрийг багцалж, бусад талд тулгахыг оролдож байна гэж тэрбээр шүүмжилжээ.

Биологийн олон янз байдлын тухай конвенц зэрэг бусад гэрээнд нарийн бичгийн газар, механизм нэг дор байрладаг жишиг тогтсон гэж Хятад үзэж байна.

“Нарийн бичгийн газар, механизмыг далай дамнуулан тусад нь байршуулах Бельги, Чилийн санал үйл ажиллагааны зардлыг өсгөж, удирдлагын үр ашгийг бууруулж, гэрээний талуудын санхүүгийн ачааллыг нэмэгдүүлэх нь дамжиггүй” гэж Мао Нин хэлжээ.

Олон улсын томоохон байгууллагуудын дийлэнх нь Европт байрладаг бол Азид нэг ч байхгүй гэж хэвлэлийн төлөөлөгч онцлов. НАТО, Европын холбооны төв байр Брюссельд аль хэдийн байрладгийг тэрбээр дурдаад, далайд гарцгүй энэ хотод далайн гэрээний механизм байрлавал Глобал Өмнөдийн орнуудын нийтлэг эрх ашиг хохирч, дижитал ялгаа улам өргөснө гэжээ.

Хятадын тайлбараар, Чили анх Глобал Өмнөдийн орнуудад ач холбогдолтой гэсэн үндэслэлээр нэр дэвшсэн ч шинэ саналаар нарийн бичгийн газрын үндсэн чиг үүргийг хэрэгжүүлэхгүй болж байна. Харин Бельги зөвхөн механизмыг байршуулахыг хүссэн нь нарийн бичгийн газрын төлөөх өрсөлдөөнөөс үнэндээ татгалзсан хэрэг гэж Мао Нин үзжээ.

Хятад гэрээнд хамгийн түрүүнд гарын үсэг зурсан орнуудын нэг бөгөөд гэрээний төсөвт хамгийн их хувь нэмэр оруулдаг гэж тэрбээр онцолжээ.

“Хятад бүрэн бэлэн. Нарийн бичгийн газрын байршлыг сонгох ажлыг зөв чиглэлд явуулж, олон улсын хамтын нийгэмлэг, ялангуяа хөгжиж буй орнуудын нийтлэг, үндсэн эрх ашгийг хамгаалахын тулд гэрээний бүх талтай хамтран ажиллахыг тэсэн ядан хүлээж байна” гэж Мао Нин хэлжээ.