Бинанс 6.34 тэрбум ам.долларын кибер халдлагын ард Хойд Солонгос байна гэж мэдэгдэв
Халдагчид хуурамч ажлын ярилцлагаар компанийн системд нэвтэрсэн гэж биржийн тайланд дурджээ.
Криптовалютын Бинанс бирж 10 дугаар сарын 29-ний кибер халдлагын ард Хойд Солонгос байна гэж Холбооны мөрдөх товчооны мэдээлэлд үндэслэн мэдэгджээ. Энэ тухай Премиум Таймс сонин мэдээлэв.
«Одоогийн мөрдөлтөөр энэ нь нарийн, олон шаттай ажиллагаа байсан нь харагдаж байна» гэж компани мэдэгдсэн байна.
Халдлагаар ойролцоогоор 6.34 тэрбум ам.долларын дижитал хөрөнгөд нөлөөлсөн ч алдагдлыг хэрэглэгчдэд тохохгүй гэж Бинанс амлажээ. Компани ойролцоогоор 2.85 тэрбум ам.долларыг царцааж, нөлөөлөлд өртсөн токены 98 хувийг нөхсөн аж.
Бэлтгэл нь 6 дугаар сард инженер хиймэл оюуны кодын хэрэгслийг суулгах гэж хуурамч файл татсанаас эхэлсэн байна.
9 дүгээр сард өөр инженерийг хуурамч компанийн төлөөлөгч нар хоёр удаа цахимаар ярилцлагад урьж, хортой код бүхий даалгаврыг ажлын компьютерт татуулсан гэж компани үзэж байна.
Халдагчид 10 дугаар сарын 20-нд дотоодын хиймэл оюуны хэрэгслээр бусад ажилтанд хүрч, авсан нэвтрэх эрхээрээ 29-нд түрийвчний гарын үсэг зурах үйлчилгээг ашигласан аж.
Бинанс 2026 онд Хойд Солонгостой холбоотой гэж сэжиглэгдсэн 57 аюулыг илрүүлж, урьдчилан сэргийлсэн гэж тайлагнажээ.
Мөрдөлт үргэлжилж байгаа бөгөөд хөндлөнгийн кибер аюулгүй байдлын шинжээчид дүгнэлтийг шалгах юм.
