Брисбений сургуулийн дэд захирал асан хүүхдийн эсрэг бэлгийн гэмт хэргээр хорих ял авчээ
Хохирогч хэргээс хойш бараг 30 жилийн турш гэм буруу, уур хилэнг тээсээр ирснээ шүүхэд ярьжээ.
Австралийн Брисбен хотын сургуулийн дэд захирал асан Мэттью Кионг 1990-ээд оны сүүлээр үйлдсэн хүүхдийн эсрэг бэлгийн гэмт хэргээр 6 сарын хорих ял авч, үүнээс 2 сарыг нь эдлэх болжээ. Энэ тухай Эй Би Си мэдээлэв.
Брисбений дүүргийн шүүхийн тангарагтны шүүх өнгөрсөн сард 54 настай Кионгыг 16 нас хүрээгүй хүүхдэд садар самуун үйлдэл үзүүлсэн 2 зүйлээр гэм буруутайд тооцсон байна. Шүүхэд хэлэлцсэнээр, хэрэг Кионг 20-иод насны дунд үедээ байхдаа өсвөр насны хүүгийн гэрт гарчээ.
Хохирогч шүүхэд уншуулсан мэдэгдэлдээ тэр шөнөөс хойш гэм буруу, уур хилэнг тээсээр ирснээ хэлжээ. “Би тэр шөнөөс өмнө нэг хүн, дараа нь тэс өөр хүн болсон” гэж тэрбээр бичсэн байна. Тэрбээр 2019 он хүртэл цагдаад мэдээлээгүй юм.
Кионгын өмгөөлөгч Марсин Лазински үйлчлүүлэгч нь тухайн үед өөрөө залуу байсныг, биед хүрээгүй гэмт хэрэг байсныг онцолжээ. Түүний хэлснээр, Кионг баривчлагдах хүртлээ олон арван жил багшилсан ч дахин гэмт хэрэг үйлдээгүй аж.
2020 онд Кионгын багшлах эрхийг түдгэлзүүлж, дараа жил нь цалингүйгээр ажлаас нь түр чөлөөлсөн бөгөөд энэ оны 8 дугаар сард ажлаас нь халжээ.
Шүүгч Энтони Рафтер хорих ял Кионгод хүнд байх нь эргэлзээгүй ч хорихоос өөр ял оногдуулах онцгой нөхцөл байхгүй гэж үзжээ. Кионгыг шүүх хурлын танхимаас шууд цагдан хорьсон бөгөөд тэнсэн харгалзах ял 12 сарын хугацаанд хүчинтэй байх юм.
