Чехийн атомын цахилгаан станцын төслөө хэвийн явуулах онцгой тогтолцоог Өмнөд Солонгос нэвтрүүлнэ

Чехийн Дуковань атомын цахилгаан станцын төслийг хэвийн үргэлжлүүлэх зорилгоор Өмнөд Солонгос онцгой удирдлагын тогтолцоо нэвтрүүлэхээ тус улсын Худалдаа, аж үйлдвэр, нөөцийн яам даваа гарагт зарласан гэж Кориа Таймс мэдээлжээ.

Төрийн өмчит КХНП компани Дэү Инженеринг, Дусан Энербилити компаниудын Солонгосын консорциумтай барилгын гэрээний гол нөхцөлөөр тохиролцож чадалгүй өнгөрсөн долоо хоногт хэлэлцээгээ зогсоожээ.

Шинэ тогтолцооны хүрээнд Засгийн газар төслийг хэвийн явуулах, ийм саатал давтагдахаас сэргийлэх арга хэмжээ боловсруулна. Яам цаашдын алхмаа хэлэлцэх анхны хуралдаанаа даваа гарагт хийхээр төлөвлөжээ.

«Сайд, дэд сайд нар ойрын хугацаанд төслийн гол асуудлуудыг долоо хоног бүр биечлэн хянаж, шаардлагатай арга хэмжээ авна» гэж Аж үйлдвэрийн сайд Ким Жон Гван хэлжээ.

КХНП хэлэлцээг албан ёсоор дуусгаж, барилгын шинэ гүйцэтгэгч сонгох тендерт бэлтгэж эхэлнэ.

Компани 2027 оны долдугаар сар гэхэд шинэ консорциумтай гэрээ байгуулж, мөн оны арваннэгдүгээр сард барилгын ажлыг эхлүүлэхийг зорьж байна.

Дуковань төсөл 25 их наяд вон буюу 17.5 тэрбум ам.долларын өртөгтэй. Солонгосын загварын тус бүр 1000 мегаваттын хоёр реактор барих энэ төслийн эрхийг КХНП тэргүүтэй Солонгосын консорциум өнгөрсөн жил авсан юм.