Данийн Ерөнхий сайд Стубб, Стёре хоёрын Путинтэй хийсэн яриаг шүүмжлэв

Данийн Ерөнхий сайд Метте Фредериксен Финландын Ерөнхийлөгч Александр Стубб, Норвегийн Ерөнхий сайд Йонас Гар Стёре нарын Оросын удирдагч Владимир Путинтэй хийсэн утасны яриаг шүүмжилжээ. Түүний хэлснээр, хэлэлцээг Европын бусад оронтой зөвшилцөөгүй гэж Данийн Ти Ви 2 телевизээс уламжлан Ведомости сонин мэдээлэв.

«Норвеги, Финландын энэ бие даасан санаачилгад би их эргэлзэж байна. Үүнийг бидний хэн нэгэнтэй ч зөвшилцөөгүй» гэж Фредериксен мэдэгдэв. Тэрбээр ийм холбоо үр дүн авчирна гэдэгт эргэлзэж, Европын орнууд Москватай тус тусдаа хэлэлцээ хийх бус, хамтран ажиллах ёстой гэж үзжээ. Түүнчлэн Орос энхийн зохицуулалтад бэлэн байгаа шинж харагдахгүй байна гэдгийг онцолсон байна.

Стубб, Стёре хоёр 10 дугаар сарын 27-нд өөрсдийн санаачилгаар Путинтэй утсаар ярьсан юм. Кремлийн мэдээлснээр, Оросын Ерөнхийлөгч тэдэнд АНУ-ын зуучлалаар Алешкид хүмүүнлэгийн ажиллагаа эхэлснийг танилцуулсан бөгөөд талууд Украины мөргөлдөөнийг зохицуулах, Абу-Дабид болох гурван талын хэлэлцээний хэтийн төлөв, Балтийн бүс нутгийн аюулгүй байдлыг хэлэлцжээ.

Финландын Ерөнхийлөгчийн тамгын газар Стубб, Стёре хоёр бүх Европын нэрийн өмнөөс бус, өөрийн орны нэрийн өмнөөс ярьсныг онцолсон. Украинская правда сайтын мэдээлснээр, тэд Путинтэй ярьсны дараа Украины Ерөнхийлөгч Владимир Зеленскийтэй холбогдсон байна.