Дроны цэрэгт алба хаана гэж гэрээ байгуулсан Челябинскийн програмист довтолгооны ангид илгээгдэж сураггүй алга болжээ

Челябинскийн мэдээллийн технологийн мэргэжилтэн Оросын Батлан хамгаалах яамтай дроны цэрэгт алба хаах гэрээ байгуулсан ч эцэст нь хүмүүсийг үхэлд хөтөлдгөөрөө нэрд гарсан ангид илгээгдэж, довтолгоонд орохдоо сураггүй алга болжээ. Энэ тухай цэргийн албан хаагчийн эхнэр Важные истории хэвлэлд ярьсныг Медуза сайт мэдээлэв.

Нэрийг нь өөрчилсөн Николай, Ирина хоёр 20 жил хамт амьдарч, хоёр хүүхэд өсгөсөн байна. Николай томоохон мэдээллийн технологийн компанид төрийн байгууллагуудад зориулсан програм хангамж хөгжүүлдэг байсан тул гэр бүл нь мөнгөний хэрэгцээгүй байжээ. 2026 оны зун Николай нийгэмд тус болохын тулд дайнд явахаар шийджээ. Ирина сэтгүүлчдэд ярихдаа тусгай цэргийн ажиллагаа эхлэхэд олон найз нь гадаад руу явсныг тэд буруушааж, улс орноо хэн хамгаалах вэ гэж бодож байсан гэжээ.

Гэрээний хавсралтад Николай дроны оператороор алба хааж, холбогдох сургалтад хамрагдана гэж заасан байв. Гэвч түүнийг Самар муж дахь 95378 дугаар цэргийн ангид, 1437 дугаар мотобуудлагын хороонд илгээсэн байна. Тэнд хэдэн сар болохдоо тэрбээр ямар ч сургалт, галын бэлтгэлд хамрагдаагүй бөгөөд аж ахуйн ажил хийж, ротын бичээч болжээ.

Оросын Батлан хамгаалах яам 2025 оны сүүлээс эхлэн оюутан зэрэг иргэдийг дроны цэрэгт идэвхтэй элсүүлж, өндөр цалин, нэг жилийн гэрээ, фронтоос хол алба хаахыг амладаг. Бодит байдал дээр гэрээ хугацаагүй бөгөөд элсүүлэгчид алба хаах онцгой нөхцөлийг баталгаажуулж чадахгүй. Николайн эхнэртээ ярьснаар, ангид нь мөнгө дээрэмддэг бөгөөд сахилга зөрчсөн хүнийг нүхэнд суулгах эсвэл довтолгоонд илгээх зэргээр хатуу шийтгэдэг байжээ.

9 дүгээр сард Николай эхнэр рүүгээ танихгүй дугаараас залгаж, байлдааны даалгаварт явах гэж байгаа тул салах ёс гүйцэтгэхийг хүсчээ. «Чамд ер нь юм заасан уу, ямар даалгаварт явуулж байгаа юм бэ гэж асуухад тэр мэдэхгүй гэж хариулаад уйлсан. Тэгээд холбоо тасарсан» гэж Ирина ярив. Удалгүй эхнэр нь командлалаас Николай 9 дүгээр сарын 28-нд тусгай цэргийн ажиллагааны даалгавар гүйцэтгэх үеэр сураггүй алга болсон тухай мэдэгдэл хүлээн авчээ. Түүнд юу тохиолдсон нь тодорхойгүй байна.

Ирина нөхрийнхөө цахим шуудангаас Озон цахим худалдааны платформын мэдэгдэл олжээ. Захидлаас үзэхэд Николай фронтод байхдаа 120 мянган рублиэр таван зөөврийн компьютер худалдан авсан аж. Эхнэрийн үзэж буйгаар, нөхрийнх нь картан дээрх нийт сая хагас орчим рублийг командлагчдын хэн нэгэн хулгайлсан. Ирина сошиал сүлжээнээс тухайн ангид алба хааж байсан бусад цэргийн ар гэрийнхний командлагчдын талаарх гомдлыг ч олжээ.

Николайн алба хааж байсан 1437 дугаар хороо Хар гусарууд гэж албан бусаар нэрлэгддэг 15 дугаар тусгай гвардийн мотобуудлагын бригадад харьяалагддаг. Украины эсрэг дайны үеэр энэ бригад Киев мужийг эзлэхэд оролцсон бөгөөд цэргүүдийг нь энгийн иргэдийг эрүүдэн шүүж, хөнөөсөн гэж сэжиглэдэг. Важные истории хэвлэлийн тогтоосноор, хороог 31 настай хурандаа Владимир Тесло командладаг бөгөөд Путин 2024 онд түүнд Оросын баатар цол олгожээ. «Нэг талаас хорооны командлагч Оросын баатар, нөгөө талаас тэр цэргүүдийг түрийвч гэж хардаг» гэж Ирина хэлэв.