Ираны Ерөнхийлөгч АНУ-ыг эрчим хүчний үнийн цочрол өдөөж байна гэж буруутгав

АНУ-ын Персийн булан дахь үйлдэл бүс нутгийн нөхцөл байдлыг тогтворгүй болгоод зогсохгүй, үнийн аюултай цочрол өдөөж, эрчим хүчний тогтвортой нийлүүлэлт, дамжин өнгөрөх тээврийг алдагдуулж байна гэж Ираны Ерөнхийлөгч Масуд Пезешкиан мэдэгджээ. Тэрбээр энэ тухай Москвад болсон Байгалийн хий экспортлогч орнуудын форумын наймдугаар дээд хэмжээний уулзалтад хэлснийг Интерфакс агентлаг мэдээлэв.

Пезешкианы хэлснээр, уулзалт дэлхийн эрчим хүчний аюулгүй байдалд урьд өмнө байгаагүй шинэ сорилт тулгарч буй үед болж байна. «Энэ хүрээнд улс төрийн хэлэлцээний дундуур хоёр үе шаттай хийсэн АНУ болон сионист дэглэмийн Бүгд Найрамдах Исламын Иран Улсын эсрэг цэргийн түрэмгийлэл олон улсын аюулгүй байдлын эсрэг хамгийн харамсалтай, аюултай үйлдлийн нэг болсон» гэж тэрбээр хэлэв.

Ираны Ерөнхийлөгчийн үзэж буйгаар, Ираны эрчим хүчний дэд бүтцийг сүйтгэж, эрчим хүчний дамжин өнгөрөх тээвэрт зохиомол саад тотгор учруулж буй нь эрчим хүчний аюулгүй байдал болон дэлхийн эдийн засагт шууд заналхийлж байна. Тэрбээр АНУ-ын Иранд тавьсан далай, агаарын бүслэлт хэлбэрийн нэг талын хязгаарлалт буюу эдийн засгийн терроризм, мөн тусгаар улсуудыг энэ бүслэлтийг дагахыг шахаж буй дарамт олон улсын эрх зүйн бүдүүлэг зөрчил бөгөөд эрчим хүчний зах зээлийг тогтворгүй болгож байна гэж онцлов.

Пезешкиан ийм хууль бус арга хэмжээг дэлхийн эрчим хүчний тэргүүлэх нийлүүлэгчид хатуу буруушааж, үр дүнтэй эсэргүүцэх ёстой гэж үзжээ. Түүний хэлснээр, АНУ-ын Персийн булан дахь цэргийн хөндлөнгийн оролцоо дэлхийн эдийн засгийн өсөлтийн хурдыг сулруулж байна.