Энэтхэгийн гурван эртний гар бичмэл ЮНЕСКО-гийн Дэлхийн дурсамжийн бүс нутгийн бүртгэлд орчээ
Гар бичмэлүүд Энэтхэгийн Пуна, Майсур, Сринагар хотын судалгааны байгууллагуудад хадгалагдаж байна.
Энэтхэгийн туульс Махабхарата, Калханагийн 12 дугаар зууны түүхэн сурвалж Ражатарангини, Каутильягийн төр барих ухааны тухай Артхашастра зохиолын гар бичмэлүүд ЮНЕСКО-гийн Дэлхийн дурсамж хөтөлбөрийн Ази, Номхон далайн бүс нутгийн бүртгэлд орсныг албаны хүмүүс Пүрэв гарагт мэдэгдсэнийг Хинду сонин мэдээлжээ.
Шийдвэрийг Индонезийн Жакарта хотод болсон бүс нутгийн бүртгэлийн 11 дүгээр хуралдаанаар гаргасныг Индира Гандигийн нэрэмжит Урлагийн үндэсний төв мэдэгджээ. Тус төв гурван бүтээлийн нэр дэвшүүлэх баримт бичгийг бэлтгэхэд чухал үүрэг гүйцэтгэсэн байна.
Энэтхэгийн Соёлын сайд Гажендра Сингх Шекхават энэ шийдвэрийг улсынхаа баримтат болон соёл иргэншлийн өвийг хүлээн зөвшөөрсөн түүхэн үйл явдал гэж онцолжээ.
Ингэснээр бүс нутгийн бүртгэлд Энэтхэгээс орсон өвийн тоо зургаад хүрчээ. 2024 онд Рамчаритаманасын зурагт гар бичмэл, Панчатантрагийн амьтдын үлгэр бүхий 15 дугаар зууны ховор гар бичмэл, Энэтхэгийн яруу найргийн онолын Сахридаялока-Лочана зохиолын гар бичмэлийг бүртгэлд оруулж байжээ.
