Эс Кей Хайникс компани хиймэл оюун ухааны чипийн эрэлтийн ачаар гуравдугаар улиралд дээд амжилттай ашиг олов

Өмнөд Солонгосын Эс Кей Хайникс компанийн борлуулалтын орлого, үйл ажиллагааны ашиг гуравдугаар улиралд өндөр зурвасын өргөнтэй санах ойн чип болон бусад санах ойн бүтээгдэхүүний эрэлт хүчтэй байгаагийн ачаар түүхэн дээд түвшинд хүрснээ лхагва гарагт мэдэгджээ. Энэ тухай Ёнхап агентлаг мэдээлэв.

Компанийн зохицуулах байгууллагад ирүүлсэн мэдээллээр, 7-9 дүгээр сард үйл ажиллагааны ашиг өмнөх оны мөн үеэс 557.2 хувиар өсч, 83.33 их наяд вон буюу 62.8 тэрбум ам.доллар болсон бол борлуулалтын орлого 327.9 хувиар өсч, 104.61 их наяд вон хүрчээ. Цэвэр ашиг мөн 215.7 хувиар өсч, дээд амжилт болох 39.77 их наяд вон болсон байна. Компанийн хэлснээр, өнгөрсөн оны хоёрдугаар улирлаас хойш зургаан улирал дараалан улирлын орлого, үйл ажиллагааны ашгаараа дээд амжилт тогтоожээ.

«Хиймэл оюун ухааны санах ойн эрэлт нэмэгдэж, гол бүтээгдэхүүний үнэ өссөн зах зээлийн нөхцөлд компани өндөр нэмүү өртөг шингэсэн бүтээгдэхүүний өрсөлдөх чадварынхаа ачаар дахин улирлын орлого, үйл ажиллагааны ашгаараа дээд амжилт тогтоолоо» гэж Эс Кей Хайникс мэдэгдэв. Компани энэхүү таатай нөхцөлд тулгуурлан өсөлтийн хурдаа хадгалахын тулд үйлдвэрлэлийн хүчин чадлаа нэмэгдүүлж, бүтээгдэхүүний өрсөлдөх чадварыг бэхжүүлэх ажлыг эрчимжүүлнэ гэжээ.

Эс Кей Хайникс өнгөрсөн долоо хоногт 40 их наяд воны хувьцаа эзэмшигчдэд буцаан олгох хөтөлбөрөө дуусгасны дараа хувьцаа эзэмшигчиддээ 60 их наяд вон буцаан олгох нэмэлт төлөвлөгөө зарласан байна. Энэ мэдэгдэл компани баасан гарагт зах зээлийн нөхцөл байдлыг шалтаглан АНУ дахь охин компани Солидигмийг хөрөнгийн биржид гаргах төлөвлөгөөгөө түр зогсоох шийдвэр гаргасны дараа гарчээ.

Солидигм ирэх жилээс АНУ-д хувьцаагаа олон нийтэд анх удаа санал болгохоор төлөвлөж байгаа бөгөөд охин компанийн үнэлгээ 150 тэрбум ам.доллар хүрч болзошгүй гэсэн мэдээлэл тархаж байв. Тусдаа бүртгүүлэх нь цөөнх хувьцаа эзэмшигчдийн ашиг сонирхолд хохирол учруулж болзошгүй гэсэн болгоомжлолоос болж хувьцаа эзэмшигчид хүчтэй эсэргүүцэж, зохицуулах байгууллага анхааралдаа авсан үед энэ шийдвэр гарсан юм. Эс Кей Хайниксийн хувьцаа хоёрдугаар улирлын үр дүнгээ зарласнаас хойшхи гурван сарын хугацаанд бараг 30 хувиар унаж, хүчтэй дарамтад орсон байна.